कविता
तानसेनले किन नायक खोजिरहेछ ?
पदम न्यौपाने
तानसेन के हो , बुझ्न नसकेकै हो ?
आफ्नै आँगनमा लेखिएको इतिहास
पढ्न नजानेकै हो ?
ढुङ्गामा कुँदिएका कथा छन्,
गल्ली–गल्लीमा समयका पदचाप छन्,
बजार, सम्पदा, दरबार, मन्दिर, चौतारा र बाटाहरूले हिजोका हजार कथा सुनाउँछन् ।
मतलव, तानसेनले इतिहास बनायो,
पुस्तौँका पाइलालाई दिशा दियो,
तर आज त्यही इतिहासले सोधिरहेछ,
मैले इतिहास बनाएँ, तर आफ्नो इतिहास बनाउने नायक खोई ?
के नायक बाहिरबाट आउनुपर्छ ?
के तानसेनको आफ्नै माटोमा बीउ छैन ?
कि तानसेनले आफ्नै मान्छे चिन्न
अझै सिकेकै छैन/सकेको छैन् ?
के तानसेन अभागी हो ?
नायक खोज्ने होइन,
नायक जन्माउने तानसेन चाहिएको छ,
आफ्नो इतिहास पढ्ने,
वर्तमान बुझ्ने र
भोलिको इतिहास लेख्ने
नयाँ तानसेनको नायक चाहिएको छ !
प्रकाशित मिति: आइतबार, भदौ ७, २०८३
प्रतिक्रिया दिनुहोस्
11-1787323884.jpg)
