पाल्पा, जिल्लाका उद्योगी व्यवसायीहरुको छाता संगठन पाल्पा उद्योग वाणिज्य संघको भदौ १४ गतेको लागि तय गरिएको साधारण सभा आन्तरिक विवादका कारण अन्तिममा आएर स्थगित भएको छ । संघको ७१ औं साधारणसभा तथा १७ औं अधिवेशन यही बर्ष परेको छ । तर संघले प्राविधिक कारणले स्थगित गर्नु परेको बताए पनि आन्तरिक विवाद मिलाउन नसक्दा अन्तिममा आएर अनिश्चित रुपमा स्थगित गरेको हो ।
संघले आज साधारण सभा गरी आजै अधिवेशनको मिति तय गर्ने तयारी गरेको थियो । सदस्यता थप्ने क्रममा हानथाप भएपछि संघ भित्र विवाद चर्किदै गएपछि निर्धारित समयमा साधारण सभा हुन नसकेको हो ।
नेपाली काँग्रेस निकट व्यवसायीहरुको बाहुल्यता रहेको संघमा अहिले दुई समुहबीच दिनहुँ टसल भइरहेको छ । अध्यक्ष शैलेन्द्र भट्टराईले विधानमा व्यवस्था भए अनुसार निर्धारित समय पुस मसान्त सम्म बनेका सदस्यहरुले मतदान गर्न पाउने कुरामा अडान लिएका थिए भने वाणिज्य उपाध्यक्ष भीमवहादुर श्रेष्ठको समुहले त्यसो नगरेर विगतका अनुभवहरुका आधारमा नयाँ–नयाँ सदस्यहरुले समेत मतदानमा सहभागी हुन पाउनुपर्ने माग गर्दै आएका थिए ।
साधारण सभाबाट निर्वाचनको मिति तोक्ने विषयमा २०८२ असार २७ गते बसेको पुर्ण बैैठकले निर्णय गरेता पनि बैंठक पछि नयाँ सदस्यताका विषयमा विवाद कायमै थियो । वाणिज्य उपाध्यक्ष भीमबहादुर श्रेष्ठ, महासचिव समीरमान सिंह समेतका बहुमत सदस्यले विगतमा भएका बैठकका निर्णयमा पुर्नविचार गर्न माग गर्दै नोटअफ डिसेन्ट लेखेपछि संघको विवाद जिल्ला प्रशासनसम्म पुगेको थियो ।
वाणिज्य उपाध्यक्ष श्रेष्ठले भने “अध्यक्ष समेतका केही साथीहरुले संघको भावना र मर्म विपरित काम गरेका कारण असहज अवस्था सिर्जना भयो । वातावरण धमिलियो, द्वन्द भयो । यस्तो अवस्थामा साधारण सभाको सबै तयारीहरु हुन सकेनन्, साधारण सभा स्थगित गर्नुपर्ने भयो । हिजो हामीहरु सबै बसेर यो समस्याको समाधान गर्ने जिम्मा पुर्वअध्यक्षहरुलाई दिएका हौं, तर समस्या समाधान हुन सकेन ।”
उपाध्यक्ष श्रेष्ठले मिलाएर लाग्नुपर्छ भन्दा नेतृत्वले एकलौटी गरे पछिको यो अवस्था आएको आरोप लगाए । उनले भने “बसेर सहमति गर्छाै, संघको गरिमा कमजोर हुन दिदैनौ ।”
संघमा चरम विवाद र पदाधिकारी बिचमै मत विभाजनका कारण साधारण सभा स्थगित गर्नु परेको संघका अध्यक्ष शैलेन्द्र भट्टराईले शित्तलपाटी डटकमलाई बताए । अध्यक्ष भट्टराईले भने“ अनुसार, केही पदाधिकारी र समितिका साथीहरुको गैरजिम्मेवारीपनका कारण साभारण सभाको पुर्वसन्ध्यामै स्थगित गर्नुपर्ने अवस्था आयो अब छिट्टै नयाँ साधारण सभाको नयाँ मिति तय गर्छौं ।” संघका महासचिव समीर मान सिंहले प्राविधिक कारणले स्थगित भएको भनिएता पनि द्वन्दकै कारण स्थगित गर्नु परेको स्वीकार गरे । संघका कोषाध्यक्ष विनायक महर्जनले भने नेतृत्वको असक्षमताका कारण साधारणसभा स्थगित भएको आरोप लगाए । उनले मनपरी गरेका कारण साधारण सभा हुन नसकेको भन्दै अन्तिममा स्थगन गर्नु कारण अध्यक्षलाई सोध्न आग्रह गरे ।
