पाल्पा, पाल्पाका ऐतिहासिक, धार्मिक, सांस्कृतिक तथा प्राकृतिक सम्पदाको प्रचार–प्रसार गर्दै आन्तरिक तथा बाÞय पर्यटन प्रवद्र्धन गर्ने उद्देश्यले पाल्पामा दुईदिने ‘हेरिटेज राइड (सम्पदा यात्रा) २०८३’ आयोजना हुने भएको छ । पाल्पा साइकलिङ संघको आयोजनामा आगामी मंसिर ५ र ६ गते तेस्रो संस्करणको सम्पदा यात्रा हुन लागेको हो ।
संघले सोमबार तानसेनमा पत्रकार सम्मेलन गरी यात्राको उद्देश्य, मार्ग र कार्यक्रमबारे जानकारी गराएको छ । संघका महासचिव विज्ञान बज्राचार्यले पाल्पाका ओझेलमा परेका पर्यटकीय तथा ऐतिहासिक गन्तव्यलाई राष्ट्रिय तथा अन्तर्राष्ट्रियस्तरमा चिनाउने अभियानका रूपमा सम्पदा यात्रा आयोजना गर्न लागिएको बताए । उनका अनुसार पहिलो दिन मंसिर ५ गते बिहान ६ः३० बजे तानसेन नगरपालिकाको टुँडिखेलबाट यात्रा सुरु हुनेछ । तानसेनको नारायण टोल, असन टोल, तानसेन दरबार र भगवती मन्दिर हुँदै आर्यभञ्ज्याङ, चिदिपानी, हुमिन तथा पूर्वखोला गाउँपालिकाका पर्यटकीय क्षेत्रको अवलोकन गर्दै साइकलयात्री निस्दी गाउँपालिकास्थित अम्रिसो बगान काउलेडाँडा पुग्ने छन् ।दोस्रो दिन मंसिर ६ गते बिहान काउलेडाँडाको पर्यटकीय क्षेत्र अवलोकन गरेपछि किर्तिपुर हुँदै रामपुर नगरपालिकासम्म यात्रा गरिनेछ । रामपुरमा दिउँसो ४ बजे कार्यक्रम समापन हुने आयोजकले जनाएको छ । यस वर्षको हेरिटेज राइडमा मेचीदेखि महाकालीसम्मका करिब २०० जना साइकलयात्री सहभागी हुनेछन् । संघका अध्यक्ष रुपेशमान महर्जनका अनुसार यात्रामा ११ जना महिला र १८९ जना पुरुष गरी २०० जनाले सहभागिता जनाउने छन् । सहभागी साइकलयात्रीको उमेर १६ देखि ६१ वर्षसम्म रहेको छ ।
विश्व साइकल यात्री तथा सगरमाथा आरोही पुष्कर शाहको समेत यात्रामा सहभागिता रहनेछ । कार्यक्रम सञ्चालनका लागि करिब १५ लाख रुपैयाँ खर्च हुने आयोजकले जनाएको छ । सम्पदा यात्राको पहिलो संस्करण २०७९ मा तानसेन र पश्चिम पाल्पाका सम्पदालाई समेटेर आयोजना गरिएको थियो । दोस्रो संस्करण २०८२ मा ‘सम्पदा यात्रा’ मूल नारासहित तानसेन दरबारदेखि रामनिहल दरबारसम्म प्रतिस्पर्धात्मक साइकल यात्रा सञ्चालन गरिएको थियो । यसपटक तेस्रो संस्करणमा तानसेनदेखि पूर्वी पाल्पाका पर्यटकीय तथा ऐतिहासिक गन्तव्यलाई प्राथमिकतामा राखिएको आयोजकले जनाएको छ । तानसेन, रम्भा, पूर्वखोला, निस्दी र रामपुरका सांस्कृतिक, धार्मिक तथा प्राकृतिक आकर्षणलाई उजागर गर्ने यात्राले स्थानीय समुदायका लागि आर्थिक अवसर सिर्जना गर्नुका साथै साइकलमार्फत स्वस्थ र दिगो जीवनशैली प्रवद्र्धन गर्ने लक्ष्य राखेको छ । पत्रकार सम्मेलनका प्रमुख अतिथि नेपाल पत्रकार महासंघ पाल्पाका अध्यक्ष कमलराज तिमिल्सिनाले पाल्पाका ऐतिहासिक, धार्मिक तथा सांस्कृतिक सम्पदालाई देशविदेशमा चिनाउन यस्ता कार्यक्रमले महत्वपूर्ण भूमिका खेल्ने बताए । पर्यटनको सम्भावना बोकेर पनि ओझेलमा परेका गन्तव्यको प्रचारप्रसारमा सम्पदा यात्राले सहयोग पु¥याउने उनको भनाइ थियो । आन्तरिक तथा बाÞय पर्यटन प्रवद्र्धनका लागि साइकल यात्रा भन्ने मूल उद्देश्यसहित आयोजना हुन लागेको कार्यक्रम पाल्पा साइकलिङ संघका अध्यक्ष रुपेशमान महर्जनको सभापतित्वमा सम्पन्न भएको थियो । कार्यक्रमको सञ्चालन संघका महासचिव विज्ञान बज्राचार्यले गरेका थिए ।


