पाल्पा, तिहारको चहलपहल बढिरहेका बेला देशका विभिन्न जिल्लामा भएका दुर्घटना तथा अन्य घटनामा परी नौ जनाले ज्यान गुमाएका छन्। केन्द्रीय समाचार कक्षका अनुसार छुट्टाछुट्टै स्थानमा भएका सवारी दुर्घटनामा छ जना, खोलामा डुबेर एक जना र अन्य दुई जना मृत अवस्थामा फेला परेका हुन् ।

प्रहरीका अनुसार सिराहाको गोलबजार नगरपालिका–७ पुरानो चौहर्वामा बा.७० प ७२०० नम्बरको मोटरसाइकल र स.१ त.७९१५ नम्बरको ट्याक्टर एकआपसमा ठोक्किँदा २२ वर्षीय लटल सदायको मृत्यु भएको छ । बिहीबार दिउँसो भएको दुर्घटनामा गम्भीर घाइते भएका सदायको विराटनगरस्थित विराट नर्सिङ होममा उपचारका क्रममा मृत्यु भएको हो । दुर्घटनामा मोटरसाइकल चालक घाइते भएका छन् भने ट्याक्टर चालकलाई प्रहरीले नियन्त्रणमा लिएको छ ।

त्यस्तै, बाराको जीतपुर सिमरा उपमहानगरपालिका–२२ चुरियामाई मन्दिर नजिक ना.६ ख १४५८ नम्बरको टूक र प्र.२–०३–००९ प ७९११ नम्बरको मोटरसाइकल एक आपसमा ठोक्किँदा २१ वर्षीय निराजन यादवको मृत्यु भएको छ । सर्लाहीको बसवरिया गाउँपालिका–३ निवासी यादवको हेटौंडास्थित जिल्ला अस्पतालमा उपचारका क्रममा मृत्यु भएको प्रहरीले जनाएको छ । दुर्घटनामा मोटरसाइकल चालक घाइते भएका छन् ।  यस्तै धनुषाको मिथिला बिहारी नगरपालिका–६ मा मोटरसाइकल दुर्घटना हुँदा २७ वर्षीय राहुल साहको पनि मृत्यु भएको छ । गम्भीर घाइते भएका साहको जनकपुरस्थित प्रादेशिक अस्पतालमा उपचारका क्रममा ज्यान गएको हो । दुर्घटनामा मोटरसाइकलमा सवार अर्का एक जना घाइते भएका छन् । यसैगरी, नवलपरासी पूर्वको कावासोती नगरपालिका–१६ मा कारले मोटरसाइकललाई ठक्कर दिँदा एक महिनाका मायुस सारूको मृत्यु भएको छ । कावासोती–१ हात्तीखोर निवासी ३२ वर्षीय रमेश सारू मगरका छोरा मायुसको चितवन मेडिकल कलेज भरतपुरमा उपचारका क्रममा मृत्यु भएको हो । दुर्घटनामा मोटरसाइकल चालक र अर्का एक जना घाइते भएका छन् । उता गोरखा नगरपालिका–८ माथिल्लो खोलखोले गैरीचौतारामा मोटरसाइकल दुर्घटना हुँदा ३० वर्षीय महेश बानियाको मृत्यु भएको छ । आरुघाटबाट गोरखातर्फ आउँदै गरेको मोटरसाइकल दुर्घटना हुँदा गम्भीर घाइते भएका बानियाको प्रादेशिक अस्पताल गोरखामा उपचारका क्रममा मृत्यु भएको प्रहरीले जनाएको छ । 

यस्तै कास्कीको पोखरा महानगरपालिका–६ जरेवरमा शुक्रबार बिहान मोटरसाइकल दुर्घटना हुँदा २२ वर्षीय देव तामाङको मृत्यु भएको छ । पोखरा–९ चिप्लेढुङ्गा बस्ने तथा मकवानपुरको हेटौंडा घर भएका तामाङको जिएमसी अस्पतालमा उपचारका क्रममा मृत्यु भएको हो ।  यसैबीच, भक्तपुरको मध्यपुर थिमि नगरपालिका–१ आँखा अस्पताल नजिक मनोहरा खोलामा डुबेर १० वर्षीया अनुष्का राईको बिहीबार साँझ मृत्यु भएको छ । यस्तै, सुर्खेतको वीरेन्द्रनगर नगरपालिका–५ चिसापानीस्थित रामजानकी सामुदायिक जंगलमा ७० वर्षीय शिवलाल गिरी मृत अवस्थामा फेला परेका छन् । रामेछापको सुनापती गाउँपालिका–५ स्थित सुनकोशी नदी किनारमा अन्दाजी २६ वर्षीय एक पुरुषको शव पनि फेला परेको प्रहरीले जनाएको छ । मृतकको पहिचान खुल्न सकेको छैन। यी सबै घटनाबारे प्रहरीले आवश्यक अनुसन्धान गरिरहेको जनाएको छ ।