पाल्पा, विश्वभर आज विश्व फार्मासिस्ट दिवस मनाइँदैछ । प्रत्येक वर्ष सेप्टेम्बर २५ मा औषधिको सुरक्षित तथा प्रभावकारी प्रयोगमा फार्मासिस्टको भूमिकाबारे जनचेतना फैलाउँदै यो दिवस मनाउने गरिन्छ ।

यस दिवसले स्वास्थ्य सेवामा फार्मासिस्टको योगदान, जिम्मेवारी र महत्वलाई उजागर गर्ने गर्दछ।फार्मासिस्ट स्वास्थ्य सेवाको महत्वपूर्ण हिस्सा हुन्। औषधिको छनोट, सही मात्रा, प्रयोग गर्ने तरिका, भण्डारण तथा औषधिबाट हुनसक्ने सम्भावित असरबारे बिरामीलाई आवश्यक जानकारी उपलब्ध गराउन उनीहरूको भूमिका महत्वपूर्ण मानिन्छ । नेपालमा पनि फार्मेसी तथा औषधि सेवाको विस्तारसँगै फार्मासिस्टको जिम्मेवारी थपिँदै गएको छ । अस्पताल, क्लिनिक, फार्मेसी, औषधि उद्योग, अनुसन्धान तथा सार्वजनिक स्वास्थ्यका विभिन्न क्षेत्रमा फार्मासिस्टहरू कार्यरत छन् । विशेषगरी चिकित्सकको सल्लाहबिना औषधि सेवन गर्ने प्रवृत्ति, औषधिको गलत मात्रा प्रयोग तथा एन्टिबायोटिकको अनुचित प्रयोगजस्ता समस्या न्यूनीकरणमा फार्मासिस्टको परामर्श महत्वपूर्ण हुन्छ । बिरामीले आफूले प्रयोग गरिरहेको औषधि, त्यसको मात्रा र प्रयोग गर्ने समयबारे स्पष्ट जानकारी पाउनु सुरक्षित उपचारका लागि आवश्यक हुन्छ । विश्व फार्मासिस्ट दिवसले औषधि केवल खरिद र सेवन गर्ने वस्तु नभई सही ज्ञान र सावधानीका साथ प्रयोग गर्नुपर्ने स्वास्थ्यसम्बन्धी महत्वपूर्ण पक्ष भएको सन्देशसमेत दिने गर्दछ ।

फार्मासिस्टको परामर्शले औषधिको प्रभावकारिता बढाउन र गलत प्रयोगबाट हुनसक्ने जोखिम घटाउन सहयोग पुर्‍याउन सक्छ । दिवसका अवसरमा नेपालमा पनि फार्मासिस्ट तथा स्वास्थ्यसम्बन्धी संघसंस्थाले विभिन्न जनचेतनामूलक कार्यक्रम, अन्तरक्रिया तथा औषधिको सुरक्षित प्रयोगसम्बन्धी गतिविधि आयोजना गर्ने गरेका छन् । स्वास्थ्य प्रणालीलाई थप प्रभावकारी बनाउन चिकित्सक, नर्स, फार्मासिस्टलगायत स्वास्थ्यकर्मीबीचको समन्वय आवश्यक रहेको स्वास्थ्य क्षेत्रका जानकारहरू बताउँछन् । विश्व फार्मासिस्ट दिवसले स्वास्थ्य सेवामा फार्मासिस्टको भूमिकालाई थप पहिचान र महत्व दिनुपर्ने विषयमा ध्यानाकर्षण गराउने अवसर प्रदान गरेको छ ।