पाल्पा, नेपाल मानव अधिकार संगठन पाल्पा शाखाले तानसेनमा रहेको निलसागर असहाय, अशक्त तथा जेष्ठ नागरिक सेवा आश्रममा पुगेर अन्तर्राष्ट्रिय मानव अधिकार दिवस मनाएको छ । शनिबार ७४ औं अन्तर्राष्ट्रिय मानव अधिकार दिवस मनाउन संगठनमा आवद्ध मानव अधिकाकर्मी र पत्रकार त्यहाँ पुगेका हुन् । आश्रममा रहेका असहाय, बेसहारा, वृद्धवृद्धा र मानसिक रूपले विक्षिप्त व्यक्तिसँग बसेर संगठनले दिवस मनाएको हो । मानवअधिकारका क्षेत्रमा काम गर्दै आएको संगठनले असहाय, बेसहारा, वृद्धहरुसँग माया र सद्भाव साट्ने उद्देश्यले आश्रममै पुगेर दिवस मनाइएको जनाएको छ । ‘सबैका लागि मर्यादा स्वतन्त्रता र न्याय’ भन्ने नाराका साथ उसले मानव अधिकार दिवस मनाएको हो ।

संगठनले त्यहाँ रहेका २५ जना असहाय, बेसहारा, वृद्धवृद्धाहरुलाई एक छाक भोजनका लागि चार हजार सहयोग समेत गरेको छ । उक्त सहयोग रकम संगठनका केन्द्रीय सदस्य त्रिलोचन पौडेलले आश्रमका संयोजक देव प्रसाद बज्राचार्यलाई हस्तान्तरण गरेका छन् । सहयोग रकम हस्तान्तरण गर्दै केन्द्रीय सदस्य पौडेलले श्रमिक, असहाय, अशक्त र वृद्धवृद्धाहरुको अधिकार दिलाउने पक्षमा सधै संगठन लागि परेको बताए । उनले भने ‘ जहिले पनि यि वर्गका व्यक्तिहरु मानवअधिकारकर्मीको प्राथमिकतामा पर्ने भएकाले पनि हामीहरु उहाँहरुसँगै बसेर दिवस मनाएका हौं ।’ आगामी दिनमा पनि रचनात्मक कार्यक्रमहरु गर्दै जाने उनले बताए । मानवअधिकारकर्मीसँगै आश्रममा पुगेका नेपाल पत्रकार महासंघका उपाध्यक्ष भरत शर्माले मानवअधिकारकर्मीले असहाय, बेसहारा, वृद्धवृद्धाप्रति देखाएको सद्भाव प्रशसनिय रहेको बताए । उनले आवाजविहीनहरुको अधिकारको प्रत्याभूति दिलाउन सहयोग गर्दैै आएका मानवअधिकारकर्मीहरु आश्रममै पुगेर कार्यक्रम आयोजना गर्नु आफैमा अनुकरणीय कार्य रहेको धारणा व्यक्त गरे । निलसागर आश्रमका संयोजक देव प्रसाद बज्राचार्यले मानवअधिकारकर्मीहरुले आश्रममा रहेका नागरिकहरु प्रति देखाएको माया र सद्भावको प्रशंसा गर्दै धन्यवाद दिए । उनले सहयोगी दाताहरुको सहयोगमा आश्रम सञ्चालन गर्दै आएको बताए । संगठनका सह–सचिव सोवाकान्त न्यौपानेले बाँच्न पाउने मानिसको नैसर्गिक अधिकार रहेको भन्दै त्यसका लागि असहाय, अशक्तहरुको खानाको प्रत्याभूति गर्ने कार्यमा संगठनले थोरै भए पनि सहयोग गरेको बताए । उनले यस पटक दिवसमा औपचारिक कार्यक्रमलाई भन्दा पनि अशक्त र जेष्ठ नागरिकलाई प्राथमितामा राखिएको एनजेडीलाई जानकारी दिए । सोही अवसरमा मानवअधिकारकर्मीहरु बेदराम श्रीस, विश्वराज रेग्मीको समेत उपस्थिती रहेको थियो ।