रमेश विश्वकर्मा
गुल्मी, राष्ट्रिय लोक तथा दोहारीगीत प्रतिष्ठान नेपाल जिल्ला शाखा गुल्मीले लोक दोहोरी दिवसको अवसर पारेर बिश्व व्यापी रुपमा फैलिरहेको नोबेल कोरोना भाईरस सम्बन्धी स्वास्थ्य जनचेतना कार्यक्रम गरेको छ । जिल्लाको तम्घासमा स्वास्थ्य सचेतना स्वरुप हस्ताक्षर गरिएको प्रतिष्ठानका जिल्ला अध्यक्ष बसन्त खत्रीले जानकारी दिए । कोरोना के हो ? यसबाट कसरी बच्ने लगायतका विभिन्न सचेतना मूलक सन्देशहरु सहित हस्ताक्षर कार्यक्रम राखिएको थियो ।
आमनागरिकलाई यसबारे सचेत रहन र सचेत छु भन्ने प्रतिवद्ध जनाउनका लागि सचेतना स्वरुप हस्ताक्षर र सचेतना कार्यक्रम गरिएको प्रतिष्ठानका अध्यक्ष खत्रीले बताए । नेपाली काँग्रेसका जिल्ला सभापति, तथा प्रतिष्ठानका सल्लाहकार भुवनप्रसाद श्रेष्ठले प्रतिष्ठानले सञ्चालन गरेको सचेतना कार्यक्रममा हस्ताक्षर गरे लगतै जिल्लाका आम सर्बसाधारणहरुले कोरोना भाईरसबाट म सचेत छु भन्दै हस्ताक्षर गरेका थिए । त्यस्तै प्रतिष्ठानले दिवसको अवसर पारेर जिल्लाको रेसुङ्गा नगरपालिका ८ निवासी युगल भुजेललाई ५ हजार ५ सय ५५ रुपैयाँ अािर्थक सहयोग गरेको छ । भुजेलका दुवै मिर्गौला फेल भएर उपचार गराई रहेका छन् । उनको आर्थिक अवस्था निकै दयनिय र कमजोर देखेर प्रतिष्ठानले आर्थिक सहयोग गरेको हो । उनी जिल्लाका चर्चित फुटबल खेलाडी तथा सामाजिक व्यक्तित्व समेत हुन । आथिक सहयोग उनका दाजु डिलबहादुर भुजेललाई हस्तान्तरण गरिएको अध्यक्ष खत्रीले जानकारी दिए ।