कृष्ण पोखरेल
पाल्पा, बाग्मती प्रदेशका स्थानीय सरकारका जनप्रतिनिधी र पाल्पा बगनासकाली गाउँपालिकाका जनप्रतिनिधी बिच सिकाई उपलब्धी नमुना कामहरुको आदान–प्रदान भएको छ । बाग्मती प्रदेशका १३ जिल्लाका नगर प्रमुख, उपप्रमुख अध्यक्ष, उपाध्यक्ष सहितको टोलीसँग बगनासकाली गाउँपालिकाले विगत साढे ४ वर्षको अवधीमा भएका सिकाई तथा महत्वपुर्ण कामका उपलब्धीहरु आदान–प्रदान भएको हो । बाग्मती प्रदेश शुसासन केन्द्रको आयोजनामा १३ वटै जिल्लाका २० जना जनप्रतिनिधी तथा केन्द्रका कर्मचारीहरु सहित लुम्बिनी प्रदेश र गण्डकी प्रदेशका स्थानीयतहहरुका सिकाई उपलब्धी आदान–प्रदान गरिएको हो । बगनासकाली गाउँपालिकाले साढे ४ वर्षको अवधीमा भएका महत्वपुर्ण काम तथा उपलब्धीहरुको जानकारी गराएको थियो । गाउँपालिकाका प्रमुख प्रशासकीय अधिकृत विष्णु घर्तिले गाउँपालिकालाई बालमैत्री गाउँपालिका घोषणा गरी स्थानीय बालमैत्री शासन लागु हुँदै आएको, गाउँपालिकालाई खरको छानामुक्त गाउँपालिका घोषणा गरी कार्यान्वयनमा आएको, पुर्ण संस्थागत सुत्केरी गाउँपालिका घोषणा गरी शुन्य होमडेलीभरी काम हुँदै आएको जानकारी गराए । वडा–वडामा ईन्टरनेट सेवा मार्फत अनलाईनबाटै राजश्व संकलन, धार्मिक पर्यटकीय गाउँपालिका निर्माणको लागी पुर्वाधारहरुको निर्माण, विदेशबाट फर्किने युवाहरुलाई स्वदेशमै कृषि, पशु उद्यमी बनाउने गरी विभिन्न रोजगारमुलक तालिम सञ्चालन, वाँदर रोकथाम तथा नियन्त्रण अभियान, बालश्रममुक्त गाउँपालिका घोषणा, पुर्ण सरसफाईयुक्त पालिका घोषणाको तयारी, एकल महिलाको तथ्यांक संकलन गरी रोजगारीमुलक तालिम सञ्चालन गर्दै आएको जनाएको छ । गाउँपालिकामा ९ वटा स्वास्थ्य चौकी मध्ये ३ वटामा बर्थिङ सेन्टर संचालनमा भएको, २ वटामा प्रयोगशाला सेवा सञ्चालन भएको अस्थायी कोभिड अस्पताल सञ्चालन गरी कोभिड बिरामीलाई निःशुल्क उपचार गर्दै आएको, कक्षा ५ सम्मका बालबालिकालाई विद्यालयमै दिवा खाजाको व्यबस्था गर्दै आएको, शैक्षिक सत्र लाई नियमित व्यवस्थित गर्न शिक्षक बालबालिकाको हात–हातमा शैक्षिक पात्रो वितरण गरिएको, कक्षा एक देखी तीन सम्म स्थानीय पाठ्यक्रम निर्माण गरी लागु गरिएको, गाउँपालिका अध्यक्ष कृष्ण प्रसाद बस्यालले बताए ।

सिद्धार्थ राजमार्ग क्षेत्रका नगरपालिका गाउँपालिका सिकाई उपलब्धीहरु आदान प्रदानको लागी रुपन्देही, पाल्पा, स्याङ्जा, कास्की, पर्वत, म्याग्दी जिल्लाका स्थानीय जनप्रतिनिधीसँग छलफल अन्तरक्रिया गर्ने र नमुना कामको आ–आफ्नो पालिकामा लागु गर्ने गरी अन्तरपालिका भ्रमणमा आएको बाग्मती प्रदेश सुशासन केन्द्रका प्रमुख विमल पोखरेलले बताए । कृषि तर्फ गाउँपालिकालाई मकैको विउ उत्पादन केन्द्रको रुपमा विकास गरिएको, पालिकाले ४ वर्षको अवधीमा ४१५ वटा कृषि औजार वितरण गरी कृषिमा यान्त्रिकरण गर्दै आएको, अदुवा, धान, मकै बेसार, सुन्तला, अकवरे खुर्सानीको पकेट क्षेत्र निर्धारण उत्पादनमा बृद्धि गर्दै आएको, शैक्षिक प्रमाणपत्र धितो राखेर स्नातक पास गरेका १० युवा कृषकहरुलाई २ वर्षे ऋण प्रदान गरेको, एकल वालीमा वार्षिक ५ सय किलो उत्पादन विक्रि गर्ने उद्यमी लाई प्रति किलो २ रुपैया अनुदान वितरण गर्दै आएको, बगनासकालीबाट वार्षिक २ करोड ५० लाखको तरकारी बाहिरी क्षेत्रमा विक्रि हुँदै आएको गाउँपालिकाका अध्यक्ष बस्यालले बताए । यसैगरी पशुतर्फ दुध, मासु र अण्डामा गाउँपालिका आत्मनिर्भर बनी बाहिरी जिल्लामा विक्रि गर्दै आएको, सबै वडामा पशु प्राविधकहरुको व्यवस्था भएको, सबै वडा तथा टोल टोलमा मोटरबाटोको सुबिधा पुगेको, नयाँ घर बनाउँदा अनिवार्य नक्साको व्यबस्था गरिएको, ४५ किलोमिटर सडक निर्माण भएको, ३० किलोमिटर ग्रावेल, ७ किलोमिटर पिच र आरसीसी गरिएको, ४ किलोमिटर पर्यटकीय पदमार्ग निर्माण भएको, ६ वटा लिफ्ट खानेपानी योजना सम्पन्न भएको, २१ वटा खानेपानी टंकी निर्माण भएको, २३ वटा विधालय भवन र २७ वटा महिला भवन निर्माण भएको गाउँपालिकाकी उपाध्यक्ष सरस्वती चिदीले बताए । सबै खानेपानी योजनाको पानी परिक्षण गरी स्वच्छ पानी वितरण भएको, लिफ्ट खानेपानी योजनाको विधुत महशुलमा ५० प्रतिशत अनुदान दिदै आएको, पानीको मुहान क्षेत्र संरक्षणकोलागि बोट विरुवा लगाउँदै आएको जानकारी दिए ।