Shittalpati
नवलपरासीका तीन पालिकामा सकियो काँग्रेसको ‘डिजिटल प्रतिनिधि परामर्श’ भेला

नवलपरासी, नेपाली कांग्रेसले पार्टी संगठनलाई प्रविधिमैत्री बनाउने उद्देश्यले नवलपरासी (बर्दघाट सुस्ता पश्चिम) का तीनवटै नगरपालिकामा डिजिटल प्रतिनिधिसम्बन्धी परामर्श भेला सम्पन्न गरेको छ । रामग्राम, सुनवल र बर्दघाट नगरपालिकामा काँग्रेसले भेला सकेको हो ।

अभियान सञ्चालनका लागि काँग्रेसले केन्द्रीय सदस्य हिमाल दत्त श्रेष्ठलाई जिम्मेवारी दिएको थयो । पार्टीले केन्द्रीय सदस्यहरूलाई विभिन्न पालिकाको जिम्मेवारी तोकेर संगठन सुदृढीकरणसँगै डिजिटल विस्तारको नीति अघि बढाएको हो । सोही क्रममा नवलपरासीमा दिएको जिम्मेवारी केन्द्रीय सदस्य श्रेष्ठले सफलतापूर्वक सम्पन्न गरेका छन् । भेलाहरुलाई सम्बोधन गर्दै उनले डिजिटल माध्यमलाई संगठन विस्तार, सूचना सम्प्रेषण र जनतासँग जोडिने प्रभावकारी माध्यमका रूपमा उपयोग गर्नुपर्ने बताए ।
 काँग्रेस पाल्पाका सभापति समेत रहेका श्रेष्ठले सामाजिक सञ्जालमा पार्टीबारे फैलिने गलत सूचना र भ्रमको तथ्य तथा प्रमाणका आधारमा प्रतिवाद गर्न कार्यकर्तालाई आग्रह गरे । कांग्रेसको इतिहास, नीति, सिद्धान्त र गतिविधिलाई नयाँ पुस्तासम्म पुर्‍याउन डिजिटल प्रतिनिधिहरूको सक्रिय भूमिका आवश्यक रहेको उनको भनाइ थियो ।  पार्टीको घट्दो जनविश्वास र राजनीतिक साख पुनः स्थापित गर्न संगठनात्मक सक्रियतासँगै प्रविधिको प्रभावकारी प्रयोग आवश्यक रहेको उल्लेख गर्दै श्रेष्ठले डिजिटल अभियानलाई भाषण र औपचारिकतामा मात्र सीमित नराखी व्यवहारमा उतार्न नेता तथा कार्यकर्तालाई आग्रह गरे ।

तीनवटै नगरपालिकामा आयोजित कार्यक्रममा नेपाली कांग्रेस नवलपरासी पश्चिमका कार्यवाहक जिल्ला सभापति विक्रमप्रसाद यादव, क्षेत्र नं. २ का सभापति एवं लुम्बिनी प्रदेशसभा सदस्य बैजनाथ जैसवाल, क्षेत्र नं. १ का सभापति एवं बर्दघाट नगरपालिकाका प्रमुख शम्भुलाल श्रेष्ठ, रामग्राम नगर सभापति बलिराम यादव, सुनवल नगर सभापति यमलाल पाण्डे र बर्दघाट नगर सभापति सुकबहादुर गुरुङलगायतको सहभागिता थियो । त्यस्तै नेपाली कांग्रेस लुम्बिनी प्रदेश सदस्य विश्वप्रेम पाठक, भीमबहादुर थापा र अञ्जना पाण्डेलगायतका नेताहरु समेत सहभागीता रहेको थियो । कार्यक्रममा लुम्बिनी प्रदेश प्रशिक्षण विभागका सहजकर्ता विनोद घिमिरेले डिजिटल प्रतिनिधिको जिम्मेवारी, सामाजिक सञ्जालको प्रभावकारी प्रयोग र डिजिटल सञ्चारमार्फत संगठन सुदृढीकरणका विषयमा प्रशिक्षण दिएका थिए ।


 

प्रकाशित मिति: आइतबार, मंसिर ६, २०८३
प्रतिक्रिया दिनुहोस्
Weather Update