पाल्पा, जिल्लाको तानसेन नगरपालिका–५ कैलाशनगरका समाजसेवी भुवानन्द कोईरालाले तानसेनस्थित भूषलडाँडामा रहेको निलसागर असहाय, अशक्त तथा जेष्ठ नागरिक सेवा आश्रमलाई खाद्यान्न सहयोग गरेका छन् । उनले स्वर्गिय धर्मपत्नी खुमकुमारी कोईरालाको स्मृति तथा १४ औं दिनको पुण्य तिथिमा  आश्रममै पुगेर  खाद्यान्न  सहयोग गरेका हुन् ।

मानव सेवा नै धर्म भएकाले आफुले सक्दो सहयोग गरेको कोईरालाले बताए । गरिब,असहाय,अशक्तहरुलाई खुसी राख्न सके मात्र पितृको सम्मान हुने भएकाले परिवारसहित  आश्रमै पुगेर खाद्यान्न सहयोग गरेको उनको भनाई छ । कोइरालाले खाद्यान्न सहयोग गरेपछि आश्रममा आश्रित रहेकाहरु उत्साहित भए । आफुहरुप्रति  कोइरालाले देखाएको सहयोग र सद्भावले मन खुसी भएको उनीहरुले बताएका छन् ।

यहाँको आश्रम विभिन्न व्यक्ति तथा संस्थाहरुको सहयोगमा सञ्चालन हुँदै आएको छ । हाल  यहाँ ५ जना महिला, १२ जना पुरुष  गरी १७ जना वृद्धवृद्धा र एक बालकाले आश्रय लिदै आएको आश्रमले जनाएको छ ।