पाल्पा, जिल्लामा स्वास्थ्य सामग्रीको अभावमा एम्बुलेन्स चालकले जोखिम मोलेर सेवा गरिरहनु परेको व्यापक गुनासो आइरहेका बेला सामाजिक संस्था नेपाल रेडक्रस सोसाइटी पाल्पाले भने एम्बुलेन्स चालकहरुलाई (पर्सनल प्रोटेक्टिभ इक्यूपमेण्ट) पिपिइ वितरण गरेको छ । अस्पतालमा जस्ता सुकै विरामीहरु पनि लैजानुपर्ने भएकाले एम्बुलेन्स चालक असुरक्षित हुने बन्दै रेडक्रसले जिल्लामा सञ्चालित १२ वटा एम्बुलेन्सका चालकहरुलाई पिपिइ वितरण गरेको हो । उक्त पिपिइ बगनाशकाली गाउँपालिका निवासी जीवन खनालको समन्वयमा उपलव्ध भएको थियो ।

विश्वव्यापी रुपमा फैलिएको कोभिड १९ कोरोना भाईरसबाट हुन सक्ने जोखिम न्यूनीकरणका लागि रेडक्रसले आफ्ना प्रयासहरु जारी राखेको छ । समुदायमा मोटिभेटरहरु र परियोजना कर्मचारीहरुले बाहिरबाट आएकाहरुलाई विशेष ख्याल गर्दै दैनिक फोन गर्ने र स्वास्थ्यको बारेमा जानकारी लिने समेत गरेको रेडक्रसका कार्यक्रम अधिकृत विनोद भारतीले बताए । रेडक्रसले यस अघि तानसेन नगरपालिका अन्तर्गत सञ्चालन भएका १० वटा एम्बुलेन्स चालक, नगरपालिका भित्र परिचालित ११ जना ट्राफिक प्रहरी र खानेपानी कार्यालय अन्र्तगत नियमित परिचालित ८ जना लायन्सम्यानहरुलाई सेनीटाइजर, सर्जिकल माक्स र ग्लोवस् समेत वितरण गरेको थियो ।

विश्वव्यापी महामारीको रुपमा फैलिरहेको कोरोना भाईरस संक्रमणबाट सुरक्षित रहनका लागि सन्देश स्वरुप स्वास्थ्य सामग्री वितरण गर्दै आएको शाखाका सभापति बुद्धिप्रसाद शर्माले बताए । उनले भने ‘एम्बुलेन्स चालकलाई सुरक्षित उपकरण आवश्यक छ,’। जिल्लामा अहिले १२ जना एम्बुलेन्स चालक रहेका छन् । एम्बुलेन्स ‘क्याविन’ वाला नभई सामान्य रहेकाले कोरोनाको संक्रमण चालकमा सहजै सर्न सक्ने हुन्छन् । एम्बुलेन्स चालकमात्र होइन स्वास्थ्यकर्मी पनि समेत कोरोनाको संक्रमणको जोखिममा रहेका छन् ।