विश्वव्यापी रुपमा नोभल कोरोना भाईरसको जोखिम बढ्दै गएपछि कैलाशनगर मिडिया प्रालि पाल्पाद्वारा प्रकाशित नवजनचेतना दैनिक पत्रिकाले परिस्थितिमा सुधार नआएसम्मका लागि प्रकाशन स्थगन गर्ने निर्णय गरेको कुरा जानकारी गराउन चहान्छौं । अत्यन्त भयावह रुपमा फैलिदै गएको कोरोना भाईरस विश्वका १ सय ९५ देशमा पुगिसकेको अवस्था र नेपाल सरकारले गरेको लकडाउनको निर्णयलाई कार्यान्वयनमा सहजता होस् भन्ने ध्येयका साथ हामीहरुले पनि एउटा कठोर र अत्यावश्यक निर्णय गरेका छौं ।

दैनिकमा कार्यरत सम्पूर्ण वितरक, प्रेसका प्राविधिक, संवाददाता र प्रकाशनमा अहोरात्र खट्ने सहकर्मीहरुमा भाइरसको संक्रमण नहोस् भनेर मास्क, स्यानिटाइजरको व्यवस्था गरेका छौं । अन्य सुरक्षा सावधानी पनि अपनाएका छौं । तापनि  काम गर्ने शिलसिलामा कुनै पनि बखत संक्रमित हुन सक्ने र त्यसबाट रोग फैलन सक्ने खतरालाई हामीले बेवास्ता गर्न नमिल्ने भएका कारण यस्तो गरिएको हो । जसअनुरूप विगत २५ वर्षदेखि निरन्तर रुपमा प्रकाशित नवजनचेतना दैनिक वर्ष २५ अंक २४२ पछि केही दिनका निम्ति स्थगन हुनेछ । हामीलाई विश्वास छ, परिस्थिति अनुकुल भएपछि हामी निरन्तर पूर्ववत रुपमा पाठक माझ आउनेछौं । यस बिच हाम्रो अनलाईन संस्करणको रुपमा रहेको शित्तलपाटी डटकम भने पलपलका खवरका साथ निरन्तर सेवारत रहने छ ।

वर्तमान भयावह अवस्थालाई मध्यनजर गरेर पत्रपत्रिकाको नियमित वर्गीकरण र अनुगमन गर्ने निकाय प्रेस काउन्सिल नेपालसँग समन्वय गरेर पब्लिकेशनको शुक्रबार बसेको बैठकले यो निर्णय गर्नु परेको हो । यसबाट हाम्रा नियमित पाठक वर्गमा पर्न जाने असुविधा प्रति क्षमाप्रार्थी छौं । यस बीच हामी हाम्रो आधिकारिक अनलाईन डिजिटल पत्रिका शित्तलपाटी डटकमबाट नोभल कोरोना भाईरसको प्रभाव र अन्य समसमायिक समाचारहरु निरन्तर पस्कनेछौं ।