पाल्पा, सहकारी ठगी प्रकरणमा मुछिएको आरोपमा उपप्रधान तथा गृहमन्त्री रवि लामिछाने माथि छानबिन गर्न संसदीय समिति बनाउनुपर्ने माग राख्दै आएको प्रमुख प्रतिपक्ष दल नेपाली काँग्रेसले अहिले पनि अडान कायमै राखेको छ । काँग्रेसले सहकारी ठगी प्रकरणमा मुछिएका लामिछानेमाथि तत्काल छानविनको लागि संसदीय समिति गठन गर्न माग गर्दै अडान कायमै राखेको हो 

उसले समिति गठनको माग गर्दै लगातार प्रतिनिधि सभामा विरोध जनाउँदै आएको छ । माग राख्दै यस अघिका प्रतिनिधि सभा बैंठकमा समेत विरोध गर्दै आएको काँग्रेसले आइतबारको प्रतिनिधि सभा बैठकमा समेत कायमै राख्यो । बैंठक सुरू हुनेवित्तकै काँग्रेस सांसदहरूले गृहमन्त्री माथि अनुसन्धान गर्न संसदीय समिति गठनको माग गर्दै संसदमा अवरोध जनाए । कांग्रेस सांसदहरू आ–आफ्नो सिटबाट उठेर अवरोध जनाएपछि सभामुख देवराज घिमिरेले सांसद संजयकुमार गौतमलाई समय दिए । सांसद गौतमले गृहमन्त्री लामिछाने माथि नैतिक र कानुनी प्रश्न उठिसकेकाले उनीमाथि छानबिन हुनुपर्नेमा जोड दिए । ‘हामीले उठाएको यो मुद्दामा सम्पूर्ण संसदको ध्यानाकर्षण गराउन चाहन्छु । सरकार यो प्रति गम्भीर बनोस् । संसदीय छानबिन समिति बनाइयोस् । यो कुरालाई चाँडोभन्दा चाँडो निष्कर्षमा पुगोस् । होइन भने यो मुद्दा बारम्बार उठाइरहनेछौं । हामी चाहदैनौं कि संसद अवरुद्ध गरौं । बाध्य भयौं भने पनि त्यो ठाउँमा पुग्नसक्छौं,’ उनले भने । नेता गौतमले लामिछानेका विषयमा प्रधानमन्त्री र प्रहरी प्रमुखहरुले दिएको जवाफले झनै संशय भएको दावी गरे ।

विपक्षीको मागप्रति सत्तापक्षले भने बेवास्ता गर्दै आएको छ । नेपाली काँग्रेसले विवादमा मुछिएका लामिछानेको राजीनामा नआई सदन चल्न नदिने अडान राख्दै आएपनि सत्तारूढ प्रमुख घटक एमाले र राष्ट्रिय स्वतन्त्र पार्टीले भने त्यो आवश्यक नभएको अडान राखेका छन् ।

काँग्रेसले उठाएको प्रश्नमा प्रधानमन्त्री पुष्पकमल दाहाल ‘प्रचण्ड’ले सदनमा जवाफ दिइसकेका छन् तर, प्रधानमन्त्रीको जवाफबाट काँग्रेस भने रुष्ट बनेको छ । उसले प्रधानमन्त्रीको जवाफ चित्त बुझ्दो नदिएको भन्दै संसदीय छानविन गठनका लागि अडान कायमै राख्दै आएको हो । समिति गठन नभएसम्म सदन चल्न नदिने कांग्रेसले चेतावनी दिएको छ । तर, सरकार भने समिति गठन गर्न तयार दैखिदैन । संसदीय छानविन गठन सम्बन्धमा सत्ता र प्रतिपक्षको अडानले जनप्रतिनिधिमूलक सर्वोच्च निकाय संसद् अनिर्णयको बन्दी बन्ने देखिएको छ ।