पाल्पा, पूर्वप्रधानमन्त्री एवं नेपाली कांग्रेस पूर्वसभापति शेरबहादुर देउवाले आफू राष्ट्रिय एकता सुदृढ गर्न स्वदेश फर्किएको बताएका छन् । ५ महिनाभन्दा बढी लामो समय विदेश बसाइपछि स्वदेश फर्किएका देउवाले अपिल जारी गर्दै भनेका छन्, “म शक्ति प्राप्त गर्ने उद्देश्यले नभई राष्ट्रिय एकता सुदृढ गर्न र मुलुकको सेवामा समर्पित हुन फर्किएको छु ।” उनले आफु नेता बनेर नभई महान राष्ट्रको आजीवन नागरिक बनेर फर्किएको उल्लेख गरे ।
देउवाले २०३३ सालमा बीपी कोइराला भारत निर्वासनबाट नेपाल फर्कँदा राष्ट्रवादी र प्रजातान्त्रिक शक्तिहरू एक हुनुपर्ने धारणा राखेको स्मरण गर्दै अहिले पनि सर्वपक्षीय राष्ट्रिय एकताको आवश्यकता रहेको बताए । उनले विगतका विभाजन र विद्वेषका घाउहरू निको पार्दै प्रतिशोधको सट्टा मेलमिलापको बाटो रोज्नुपर्नेमा जोड दिए । “यस्तो नेपाल निर्माण गरौं जहाँ प्रत्येक बालकले निर्भिक सपना देख्न सकोस्, प्रत्येक ज्येष्ठ नागरिकले सम्मानपूर्वक विश्राम गर्न पाओस् र प्रत्येक समुदाय समृद्धि तथा अवसरका साथ फस्टाउन सकोस्,” देउवाले भनेका छन् । देउवाले सार्वजनिक जीवनमा पदमा बसेर काम गर्दै जाँदा विभिन्न आलोचना, प्रत्यालोचनाहरू हुनु स्वाभाविक रहेको पनि जनाएका छन् ।
“मैले सधैँ भन्ने गरेको छु जीवनमा राष्ट्र, लोकतन्त्र, नागरिक, संविधान र कानुनलाई सर्वोपरी मानी काम गरेको छु । कानुन र नीति विपरीत कुनै काम गरेको छैन । मेरो जीवन खुला किताब हो । म प्रतिज्ञा गर्दछु अझ पनि जीवन रहँदासम्म राष्ट्र, राष्ट्रियता, लोकतन्त्र, मुलुक र जनताको सर्वोत्तम हित, संविधान कानुन र नैतिकता मूल्य मान्यताअनुरुप काम गर्नेछु र यी विषयमा कुनै कसैसँग मेरो सम्झौता हुन सक्दैन,” देउवाले भनेका छन् । देउवाले उपचारका क्रममा आफ्नो स्वास्थ्य अवस्थाबारे चासो राख्ने, चिन्ता व्यक्त गर्ने तथा स्वास्थ्यलाभको कामना गर्ने सबैप्रति आभार व्यक्त गरेका छन् । उनले आफूलाई ‘विनम्र सेवक’का रूपमा प्रस्तुत गर्दै सुन्न, सिक्न र समुन्नत मुलुक निर्माणको यात्रामा योगदान गर्न तयार रहेको बताएका छन् । उनले नेपाली कांग्रेस लामो राजनीतिक संघर्षबाट स्थापित भएको पार्टी भएको उल्लेख गरेका छन् ।
२०२० सालदेखि आफू निरन्तर राजनीतिक संघर्ष र यात्रामा सहभागी हुँदै आएको स्मरण गर्दै देउवाले बीपी कोइराला, सुवर्णशमशेर राणा, गणेशमान सिंह, कृष्णप्रसाद भट्टराई र गिरिजाप्रसाद कोइरालालगायत अग्रज नेताहरूको त्याग र योगदानलाई नयाँ पुस्ताले बिर्सन नहुने बताए । उनका अनुसार अग्रजहरूले निर्माण गरेको राजनीतिक विरासत गौरवको विषय मात्र नभई जनताको विश्वासका रूपमा वर्तमान पुस्ताले बहन गरिरहेको जिम्मेवारी हो । देउवाले पछिल्लो समय युवा पुस्तामा देखिएको असन्तुष्टि र परिवर्तनको आकांक्षालाई नेपाली कांग्रेसले गम्भीर रूपमा लिनुपर्ने बताएका छन् । विश्व परिवर्तन भइरहेकाले नेपाली राजनीति पनि समयको गतिसँगै अघि बढ्नुपर्ने उनको भनाइ छ । गत भदौमा भएको जेनजी आन्दोलनका जायज मागलाई सम्बोधन गर्नुपर्ने धारणा आफूले त्यतिबेलै राखेको उनले स्मरण गरे ।
परिवर्तनको अर्थ विगतका पुस्ताको संघर्ष, त्याग र बलिदानलाई अस्वीकार गर्नु नभएको स्पष्ट पार्दै उनले लोकतन्त्र, स्वतन्त्रता, अधिकार र राजनीतिक प्रणाली निर्माणका लागि अघिल्लो पुस्ताले गरेको योगदानको सम्मान गर्नुपर्ने बताए । “केही कमी–कमजोरी भए होलान्, तर त्यसलाई स्वीकार गर्दै समुन्नत मुलुक निर्माणमा सबै पक्षको हातेमालो आवश्यक छ,” देउवाको भनाइ छ । उनले लोकतन्त्रमा सत्ता अस्थायी हुने तर जनताको मन बुझ्ने नेता दीर्घकालसम्म स्मरणीय हुने धारणा पनि व्यक्त गरेका छन् । सिंगापुर गएको पाँच महिनापछि उनी हङकङ हुँदै विहीबार नेपाल फर्किएका हुन् ।
उनी लामो समयदेखि उपचारका क्रममा विदेशमा थिए । गत भदौ २४ गते जेनजी आन्दोलनका क्रममा गम्भीर घाइते भएपछि देउवा श्रीमती आरजु राणासँगै उपचारका लागि सिंगापुर गएका थिए । उनलाई विमानस्थलमा बाजागाजा र झाँकीसहित भव्य स्वागत गरिएको थियो । संस्थापनइतर समूहको राष्ट्रिय भेलामा सहभागी हुन काठमाडौं आएका देशभरका कार्यकर्ता उनको स्वागतका लागि विमानस्थल पुगेका थिए । देउवा शुक्रबार सुकेधारास्थित पार्टी प्यालेसमा आयोजना हुन लागेको संस्थापनइतर पक्षको राष्ट्रिय भेलामा सहभागी हुने कार्यक्रम छ ।
