काठमाडौं, सरस्वती युथ क्लवलाई हराउदै विभागीय टोली त्रिभुवन आर्मी शहीद स्मारक ए लिगको शीर्ष स्थानमा उक्लिएको छ । बिहीबार भएको खेलमा आर्मीले सरस्वती युथ क्लबलाई १–० गोल अन्तरले हराउदै शीर्ष स्थानमा उक्लिएको हो । लिगमा आर्मीको यो चौथो जित हो । पाँचमध्ये चार खेल जितेको आर्मी १२ अंक जोड्दै शीर्ष स्थानमा उक्लिएको छ । मनाङ मर्स्याङ्दी ११ अंकका साथ दोस्रो स्थानमा छ ।

त्रिपुरेश्वरस्थित दशरथ रंगशालामा भएको खेलमा सरस्वतीलाई पराजित गर्न आर्मीका जर्ज प्रिन्स कार्कीले निर्णायक गोल गरे ।खेलको २९ औं मिनेटमा दिनेश हेन्जनले पेनाल्टी एरियामा दिएको क्रसमा जर्जले गोल गरेका हुन् । दोस्रो हाफमा पनि हार्मीले गोल गर्ने अवसर पाएको थियो तर सदुपयोग गर्न सकेन । ७४औं मिनेटमा सन्तोष तामाङको फ्रिकिकमा नवयुग श्रेष्ठले हानेको बल पोष्ट नजिकैबाट बाहिरियो । लगत्तै टंक बस्नेतले वान भर्सेस वानमा चुकेको थिए ।