पाल्पा, जनआस्था साप्ताहिकका सम्पादक तथा प्रेस काउन्सिल नेपालका पूर्व कार्यवाहक अध्यक्ष किशोर श्रेष्ठलाई समाचार लेखेकै कारण पक्राउ गरिएको भन्दै नेपाल पत्रकार महासंघ पाल्पाका पूर्वदेखि वर्तमान नेतृत्वका पत्रकार अगुवा र एक पत्रकार प्रतिष्ठानले गम्भीर आपत्ति जनाएका छन् ।

नेपाल पत्रकार महासंघ पाल्पाका संस्थापकदेखि वर्तमान नेतृत्वसम्मका मेघराज शर्मा, गोविन्द भट्टराई, झपेन्द्र गहिरे, भगवान भण्डारी, राजेशकुमार अर्याल, रेखिराम राना र कमलराज तिमिल्सेनाले  संयुक्त विज्ञप्ती जारी गर्दै पत्रकार श्रेष्ठलाई तत्काल रिहाइ गर्न माग गरेका हुन् ।उनीहरुले श्रेष्ठलाई तत्काल बिनाशर्त रिहा गरी प्रेस स्वतन्त्रताको सम्मान गर्न सरकारसँग माग गरेका छन् । साथै समाचारसम्बन्धी विवादको निरुपण प्रेस काउन्सिलमार्फत गर्न र सुरक्षा निकायमार्फत प्रेस नियमन गर्ने प्रवृत्ति अन्त्य गर्न उनीहरूले आग्रह गरेका छन् । यस्तै पुष्पलाल स्मृति प्रतिष्ठान नेपाल पाल्पाले पनि एक विज्ञप्ति जारी गर्दै श्रेष्ठको तत्काल रिहाइको माग गरेको छ । पत्रकार प्रतिष्ठानका निवर्तमान अध्यक्ष गोविन्दप्रसाद भट्टराई र अध्यक्ष सन्तोष खनालद्वारा जारी विज्ञप्तिमा प्रकाशित समाचारप्रति असहमति भए प्रेस काउन्सिल नेपालमार्फत कानुनी प्रक्रिया अघि बढाउनुपर्नेमा प्रहरीमार्फत पत्रकार पक्राउ तथा सञ्चार सामग्री जफत गरिनु प्रेस तथा अभिव्यक्ति स्वतन्त्रता, पत्रकार आचारसंहिता र संविधानको मर्मविपरीत भएको ठहर छ ।

उनीहरूका अनुसार श्रेष्ठलाई साउन २७ गते राति करिब ९ बजे काठमाडौं प्रहरी परिसरको टोलीले ललितपुरस्थित निवासबाट पक्राउ गरेको थियो । पक्राउपछि समाचारको स्रोत खोज्ने क्रममा प्रहरीले घर तथा कार्यालयमा पटक–पटक खानतलासी गरी सिपीयू, ल्यापटप, मोबाइल, आइप्याडलगायत सञ्चार उपकरण तथा बालबालिकाका अध्ययन सामग्रीसमेत जफत गरेको परिवारको भनाइ छ ।