हरेक वर्ष मनाइने मित्रता दिवसले मानिस–मानिसबीचको विश्वास, सहयोग, आत्मीयता र सम्मानको सम्बन्धलाई स्मरण गराउँछ । मित्रता केवल रमाइलोका क्षण बाँड्ने सम्बन्ध मात्र होइन, सुख–दुःखमा साथ दिने, सही मार्गतर्फ प्रेरित गर्ने र जीवनका चुनौतीहरू सामना गर्न हौसला प्रदान गर्ने अमूल्य बन्धन हो ।  यही कारणले मित्रता दिवसको महत्व दिनप्रतिदिन बढ्दै गएको छ । यस वर्ष पनि गत विहीबार अन्तर्राष्ट्रिय मित्रता दिवस नेपालसहित विश्वभरी मनाइएको छ । संयुक्त राष्ट्र संघले ३० जुलाईलाई अन्तर्राष्ट्रिय मित्रता दिवसको रूपमा आधिकारिक रूपमा मान्यता दिएको थियो । सोही अनुरुप हरेक वर्ष यो दिवस मनाउने गरिएको हो । यो दिवसको प्रमुख उद्देश्य भनेको पनि साथीहरुसँग सम्बन्ध मजबुद बनाउनु र मानसिक तनावबाट छुटकारा पाउनु हो ।

साँचो मित्रता केवल रमाइलो गर्ने सम्बन्ध मात्र होइन, सुख–दुःखमा साथ दिने विश्वास, सम्मान र सहयोगको बन्धन हो । जीवनका कठिन परिस्थितिमा परिवारपछि सबैभन्दा ठूलो साथ दिने व्यक्ति प्रायः असल मित्र नै हुन्छ । आजको डिजिटल युगमा सामाजिक सञ्जालमार्फत सयौँ साथी बनाउन सकिन्छ । तर साथीको संख्या भन्दा पनि सम्बन्धको गुणस्तर महत्वपूर्ण हुन्छ । साँचो मित्रले सही बाटो देखाउँछ, गल्ती गर्दा सच्याउँछ र सफलतामा खुसी मनाउनुका साथै असफलतामा हौसला दिन्छ । त्यसैले मित्रता स्वार्थमा आधारित नभई विश्वास, इमानदारी र आपसी सम्मानमा आधारित हुनुपर्छ । दुर्भाग्यवश, पछिल्लो समय स्वार्थ, प्रतिस्पर्धा र भौतिकवादी सोचका कारण मित्रताको मूल्य कमजोर बन्दै गएको महसुस हुन्छ । आवश्यकता पर्दा मात्र सम्बन्ध खोज्ने प्रवृत्तिले मित्रताको वास्तविक अर्थलाई ओझेलमा पारेको छ । यस्तो अवस्थामा युवापुस्ताले असल साथीको छनोट गर्न र आफू पनि विश्वासयोग्य मित्र बन्न सिक्न आवश्यक छ । मित्रता व्यक्तिको व्यक्तिगत जीवन मात्र होइन, समाजमा पनि सकारात्मक वातावरण निर्माण गर्ने आधार हो । असल मित्रताले सहयोग, सहिष्णुता, एकता र सद्भावको भावना विकास गर्छ । साँचो मित्रता धन–सम्पत्तिभन्दा पनि मूल्यवान् सम्पत्ति हो । त्यसैले मित्रतालाई जोगाउनु, विश्वास कायम राख्नु र एकअर्काको सम्मान गर्नु आजको आवश्यकता हो ।