पाल्पा, नेकपा एमालेको ११ औं राष्ट्रिय महाधिवेशनका लागि पाल्पाबाट विभिन्न तहमा १४ जना प्रतिनिधीहरु निर्वाचित भएका छन् । महाधिवेशन प्रतिनिधी छनौटको लागि अन्तिम समय सम्म सहमतिको लागि प्रयास भए पनि दलित प्रतिनिधी बाहेक, खुला, महिला, र युवा प्रतिनिधी छनौटमा निर्वाचन भएको हो ।
पाल्पा क्षेत्र नं.१ मा भएको प्रतिनिधी छनौट निर्वाचनमा नारायण प्रसाद आचार्य, खेमबहादुर सारु, दमन सिंह पाटा, विष्णु आचार्य निर्वाचित भएका छन् भने महिलातर्फ दुर्गा देवी राना, तिरन कुमारी श्रेष्ठ र युवातर्फ सन्देश ढकाल निर्वाचित भएका छन् । निर्वाचित आचार्य निवर्तमान प्रतिनिधिसभा सदस्य एव एमाले पाल्पाका पुर्व अध्यक्ष हुन भने सारु लुम्बिनी प्रदेशका स्वास्थयमन्त्री हुन । पाटा एमाले जिल्ला कमिटी सदस्य र अर्का आचार्य युवासंघका पूर्व अध्यक्ष हुन् । निर्वाचित ढकाल अनेरास्ववियुका जिल्ला अध्यक्ष हुन् भने श्रेष्ठ निस्दी गाउँपालिकाकी उपाध्यक्ष हुन । यस्तै राना रामपुर नगरपालिकाकी स्थानीयतह निर्वाचन २०७९ की उप मेयरकी उम्मेदवार हुन् । पाल्पा क्षेत्र नं. १ को प्रतिनिधी छनौटको लागि रामपुर नगरपालिकाको जब्गादीमा निर्वाचन भएको थियो ।
यसैगरी पाल्पा क्षेत्र नं. २ मा भएको निर्वाचनमा खुलातर्फ एमाले जिल्ला अध्यक्ष ओमबहादुर घर्ती मगर, सचिव रामजी पोखरेल, पुर्व अध्यक्ष धनेन्द्रराज घिमिरे निर्वाचित भएका छन् भने युवा तर्फ सह–सचिव दिपक विश्वकर्मा विजयी भएका छन् । यसैगरी महिलातर्फ सरस्वती चिदी दर्लामी, लक्ष्मी खनाल चयन भएका छन् ।
निर्वाचित भएकी चिदी बगनासकाली गाउँपालिकाकी अध्यक्ष हुन् भने खनाल रिब्दीकोट गाउँपालिकाकी निवर्तमान उपाध्यक्ष हुनु । दलित तर्फ सिङ्गो जिल्लाबाट चेतप्रसाद रसाइली चयन भएका छन् । पाल्पा क्षेत्र नं. २ मा महिला प्रतिनिधिहरु निर्विरोध चयन भएका हुन् । पाल्पा क्षेत्र नं. २ मा प्रतिनिधी छनौटको लागि तानसेन नगरपालिकामा निर्वाचन भएको हो ।
नेकपा एमाले पाल्पामा लामो समय पछि प्रतिनिधि छनौटमा निर्वाचन भएको हो । पाल्पाबाट जेनजी उमेर समुहमा सबैभन्दा कान्छो प्रतिनिधीको रुपमा २४ बर्षिय सन्देश ढकाल निर्वाचित भएका हुन । महाधिवेशन प्रतिनिधीमा प्रतिष्प्रर्धामा सहभागीहरुले पार्टीमा आन्तरिक लोकतन्त्रको अभ्यास शुरु भएको, निर्वाचनमा भाग लिएपछि हारजित स्वभाविक भएको प्रतिक्रिया दिएका छन् ।
पाल्पाका १० वटा स्थानीय तह अनुसार प्रतिनिधी छनौटमा रामपुर नगरपालिकाबाट ३ जना, तानसेन नगरपालिकाबाट २ जना बगनासकाली गाउँपालिकाबाट २ जना, निस्दी गाउँपालिकाबाट २ जना,पुर्वखोला गाउँपालिकाबाट २ जना, रैनादेवी छहरा गाउँपालिकाबाट १ जना, रिब्दीकोट गाउँपालिकाबाट १ जना र तिनाउ गाउँपालिकाबाट १ जना गरी १४ जना प्रतिनिधिहरु निर्वाचित भएका हुन् । पालिकागत रुपमा माथागढी र रम्भा गाउँपालिकाले महाधिवेशन प्रतिनिधी पाउन सकेन । एमालेको ११ औं महाधिवेशन यही मंसिर २७ गते देखी काठमाडौमा हँुदै छ । पार्टीको केन्द्रिय अध्यक्षको लागि वर्तमान अध्यक्ष केपी शर्मा ओली र बरिष्ठ उपाध्यक्ष ईश्वर पोखरेलले उम्मेदवारी घोषणा गरिसकेका छन् ।
