नेपालमा समय–समयमा हैजाको प्रकोप आइरहेको देखिन्छ ।  केही दिन यता वीरगञ्जमा हैजा माहमारी फैलिएको छ । सोमबारसम्म ३४४ जनाभन्दा बढी बिरामी अस्पताल पुगिसकेका र तीमध्ये ९३ जनामा हैजाको सङ्क्रमण पुष्टि भइसकेको छ भने ३ जनाको मृत्यु भइसकेको छ । त्यहाँ हैजा नियन्त्रणका लागि संघीय, प्रदेश र स्थानीय सरकारले ‘अधिकतम प्रयास’ गरेको बताइए पनि संक्रमितको संख्या दिनदिनै बढ्दो छ । दूषित पानी र अस्वच्छ सरसफाइ यसको मुख्य कारण हो भन्ने थाहा हुँदाहुँदै पनि रोग नियन्त्रणमा सरकार एवं स्थानीय तहहरू निरन्तर चुकिरहेका देखिन्छन् । जसका कारण हैजा प्रकोपका रुपमा देखाए परेको छ । यसको नियन्त्रण गरिएन भने देशभर फैलिन सक्छ ।

यद्यपि संक्रमणको अवस्था अहिले नै भयावह भैसकेको भने छैन । तर यसको हेलचेक्र्याइँ गरिएमा अवस्था भयावह नहोला भन्न सकिदैन । एकातिर गर्मीको असर, अर्कोतिर मनसुनसमेत सक्रिय भएको कारण हैजाको प्रभाव देखिन थालेको हो । वर्षायामले बाढीपहिरोजन्य प्राकृतिक प्रकोपलाई मात्रै निम्त्याउँदैन, विभिन्न रोगहरुलाई समेत निम्त्याइरहेको हुन्छ । यो समय रोग र महामारी बढाउनका लागि उपयुक्त समय पनि हो । विशेषगरी हैजा दूषित पानी, अस्वस्थ खानेकुराका कारण फैलिन्छ । पानी र खानेकुरा जस्तो खाए पनि हुन्छ भन्ने मानसिकताकै कारण हैजाको संक्रमण फैलिन पुग्छ । समयमै यसको हेक्का राख्न सकिएन भने वीरगञ्जमा फैलिएको हैजा अन्य जिल्लाहरुमा पनि नफैलिएला भन्न सकिदैन । दूषित पानी र अस्वस्थ खानेकुराकै कारण हैजा हुन सक्ने भएकाले नागरिकहरुको स्वास्थ्य बचाउनका लागि सरकारले नै पानी तथा खानेकुराजन्य पदार्थको प्रभावकारी ढङ्गले अनुगमन तथा नियमन गर्न ढिलाइ गर्नु हुँदैन । फैलिरहेको हैजाको जीवाणुको यकिन स्रोत पत्ता लगाउँदै त्यसमाथि तुरून्तै रोकथाम र नियन्त्रणको प्रयासले मूर्तरुप पाउनुपर्छ । यसर्थ सरकारले हैजा नियन्त्रण गर्ने दिशामा सम्पूर्ण साधनस्रोतलाई केन्द्रीत गर्न जरुरी छ । अन्यथा वीरगञ्जमा मात्रै देखिएको हैजाको संक्रमण अन्य ठाउँहरुमा फैलिन नसकोस् ।