पाल्पा, लायन्स लाकोल आँखा अस्पताल पाल्पाले मोतीबिन्दुका विरामीहरुको अत्याधुनिक मेसिन फेकोबाट (अप्रेसन) शल्यक्रिया सेवा सञ्चालन गरेको छ । अस्पतालले बिहीबारदेखि आधुनिक प्रविधि फेको मेसिनबाट आँखाको अप्रेसन सेवा सुरु गरेको हो ।
आधुनिक ढंगले शल्यक्रिया गर्दा धेरै चिरफार गर्न नपर्ने, सरल र सहज हुने अस्पतालका डाक्टर सुचेन कुमार पुनले बताए । आँखाको अप्रेसन गर्नुपर्ने विरामीहरुलाई मध्यनजर गरी फेको मेसिन ल्याइएको डा. पुनले जानकारी दिए । उनका अनुसार उक्त प्रविधिको मेसिनबाट आँखा भित्र सरसफाई गरी सरल ढंगले छिटो छरितो शल्यक्रिया गर्न सकिन्छ । अस्पतालमा आधुनिक मेसिन ल्याएसँगै आँखाका बरामीहरुलाई भैरहवा, काठमाडौं, पोखरा धाउनु नपर्ने डा.पुनले बताए ।
नेपाल नेत्रज्योति संघका कार्यवाहक सभापति भिमसेन कार्कीले आँखाका बिरामीहरुको माग अनुसार आधुनिक मेसिन खरिद गरी सेवा लिन दिन थालिएको बताए । उनले आँखा अस्पतालले पाल्पा लगायत गुल्मी, अर्घाखाँचीमा समेत शल्यक्रिया सेवा दिदै आएको जानकारी दिए ।
अस्पतालले प्रथम पटक मेसिनबाट शल्यक्रिया गरेका बिरामीहरुलाई हर्लिक्स र विस्कुट समेत दिएको संघका सचिव राजेन्द्र लिगल बताए । शल्यक्रियापछि विरामी बगनासकालीका कमल प्रताप खाँण ठकुरीले जिल्लामै आधुनिक मेसिनबाट अप्रेसन गर्न पाएकोमा खुसी व्यक्त गरे ।
