पछिल्लो समय पर्यटन क्षेत्रमा सुधार हुँदै गएको छ । जेनजी आन्दोलनको प्रभाव क्रमशः कम हुँदै गएको र पर्यटकीय मौसम सुरु भएकाले पर्यटन क्षेत्रमा सुधार हुँदै गएको पाइन्छ । अहिले विदेशी पर्यटकको आगमन बढेको छ । नेपालमा गएको महिनामा सवा १ लाखको संख्यामा विदेशी पर्यटक आएका थिए । नोभेम्बर र डिसेम्बर महिना पर्यटकका लागि उपयुक्त सिजन भएका कारण पनि पर्यटनहरुको आवागमन बढ्दो छ । जसले गर्दा पर्यटकीय क्षेत्रका होटलहरु भरिभराउ हुन थालेका छन् । घुम्न नेपाल आउने विदेशी पर्यटकको संख्याले नेपाली पर्यटन बजारमा थप उत्साह बढाउँदै गएको छ । पछिल्लो समय हवाई मार्ग र स्थलमार्ग भएर नेपाल भित्रिने पर्यटकको संख्या बढ्दै गएपछि पर्यटन व्यवसायीसमेत हौसिएका छन् । केही दिन यता पाल्पाका पर्यटकीय स्थलहरुमा विदेशी पर्यटकहरुको चहलपहल बढ्दो देखिएको छ । यसले थोरै भए पनि जिल्लाका व्यवसायीहरुलाई उत्साह जगाएको छ ।

 सेप्टेम्बरदेखि नोभेम्बर मध्यसम्मको समयलाई विदेशी पर्यटक आउने सिजन मानिन्छ । त्यसबाहेक अर्काे सिजन फेब्रुअरीदेखि अप्रिलसम्म मानिन्छ । त्यसैले पनि त्यो बिचमा पर्यटकहरुको आगमन बढेको पाइन्छ । यसलाई सकारात्मक मान्नुपर्छ । तर आएका पर्यटकहरुको बसाईलाई लम्ब्याउने दिशामा सम्बन्धित निकायको ध्यान जान सकेको  छैन् । यो भने अत्यन्त दुखको कुरा हो । पर्यटन क्षेत्रको समग्र विकासका लागि पर्यटकीय पूर्वाधारको विकास निकै महत्वपूर्ण छ । नेपालले धार्मिक, सांस्कृतिक सम्पदाको संरक्षण तथा सम्बद्र्धन गरी थप आकर्षक गन्तव्यको विकास गर्नुपर्छ । पर्यटकलाई सांस्कृतिक सम्पदासँग जोड्ने आकर्षक कार्यक्रम बनाउनुपर्छ । यसका साथै, स्थानीय उत्पादनलाई पर्यटकीय उपजका रूपमा प्रवद्र्धन गरी अग्र र पृष्ठ सम्बन्ध विकासमा जोड दिनुपर्छ । तर पछिल्लो समय पर्यटन क्षेत्रलाई प्राकृतिक विपत्तीले मात्र नभएर बन्द, हडताल, राजनीतिक धर्ना, जुलुसजस्ता गतिविधिले पनि बिथोलेको छ । यसैका कारण पनि विदेशीले राख्ने यात्रा सुझाव नकारात्मक हुने गरेका छन् जसलाई हटाउन सरकारले समेत पर्याप्त कूटनीतिक पहल गरिरहेको छैन । त्यसैले पनि सरकार र राजनीतिक दलहरूले राजनीतिक किचलोका कारण उत्पन्न हुने यस किसिमका बन्द, हडतालजस्ता गतिविधि नहुने वातावरण बनाउँदै आर्थिक समृद्धिको बाटोतिर लम्किने पहल गर्नुपर्छ । त्यसो भयो भने अर्थतन्त्रका सूचकहरूमा सुधार आउने छ । यसका साथै कुल गार्हस्थ उत्पादनमा उल्लेख्य योगदान रहेको र लाखौंको रोजीरोटीसँग जोडिएको पर्यटन क्षेत्रको सुधारमा पनि उत्तिकै ध्यान दिन आवश्यक छ । त्यसका लागि राष्ट्रियस्तरमा पर्यटन क्षेत्रको सुधारका कार्यक्रमहरू ल्याउँदै अन्तर्राष्ट्रिय समुदायसमक्ष त्यसको व्यापक प्रचार प्रसार गर्न जरुरी छ ।