पाल्पा, सिद्धार्थ राजमार्गको दोभान–चिडियाखोला सडक खण्ड फेरि बन्द हुने भएको छ । सिद्धबाबामा सुरुङमार्ग निर्माणका लागि रामापिथेकस पार्क नजिक डाइभर्सन निर्माणको काम भइरहेकाले चैत २१ गते मंगलबारदेखि दिउँसो र रातिको समयमा सिद्धार्थ राजमार्ग बन्द हुने भएको हो ।

जिल्ला प्रशासन कार्यालय पाल्पामा बसेको राजमार्ग सुरक्षा समितिको बैठकले विहान ११ बजेदेखि २ बजेसम्म र राति १० बजेदेखि बिहान ४ बजेसम्म सडक बन्द गरी काम गर्न दिने निर्णय गरिएको प्रमुख जिल्ला अधिकारी बन्धुप्रसाद बास्तोलाले बताए । उनका अनुसार रामापिथेकस पार्क नजिक सडक डाइभर्सनको काम सुुरु भएको र माथिबाट खुुकुुला ढुँगाहरु पहरोबाट झरी काम गर्न जोखिम हुने भन्दै मंगलबारदेखि अर्को सूचना प्रकाशित नहुँदासम्म राजमार्ग बन्द गरेर काम गर्न दिइने निर्णय भएको हो । उक्त समयमा एम्बुलेन्स लगायत अत्यावश्यकीय सवारी सञ्चालनमा भने अवरोध नगर्ने गरी काम गर्न सम्बन्धित योजना कार्यलयलाई आग्रह गरिएको छ । यस अघि पनि फागुन १३ गतेदेखि १५ दिन दिउँसो र रातिको समयमा दैनिक ८ घण्टा राजमार्ग बन्द गरी काम गरिएको थियो ।