आफ्ना कार्यकर्ता माथिको मुद्दा फिर्ता लगायत सहमति पालना गर्न माग गर्दै नेत्रविक्रम चन्द नेतृत्वको नेपाल कम्युनिष्ट पार्टी सहितका चार कम्युनिष्ट पार्टीको संयुक्त मोर्चाले मंगलबार नेपाल बन्द गर्‍यो । बन्दले देशभरका शैक्षिक संस्था, उद्योग कलकारखाना, यातायातका साधन पूर्ण रुपमा ठप्प नै रहे । विभिन्न बहानामा हुने गरेका बन्द, हड्तालबाट जनता वाक्कदिक्क भएका छन् ।

भूकम्प, मधेस आन्दोलन र भारतीय नाकाबन्दी र कोरोना महामारीमा मुलुकले खर्बाैंको नोक्सानी व्यहोर्नुपरेको तीतो यथार्थ जगजाहेर हुँदाहुँदै पनि बन्द, हड्ताल हुनु विडम्बना हो । बन्द, हड्तालका कार्यक्रम जुन समूह वा दलले आयोजना गरे पनि त्यसको प्रत्यक्ष असर भने सर्वसाधारणलाई नै पर्ने गर्दछ । विगतमा बन्द, हड्तालजस्ता कार्यक्रमबाट आजित भएका जनताले फेरि बन्दको सास्ती भोग्न विवश भएका छन् । बन्द, हड्तालले गर्दा यातायातका साधन ठप्प हुँदा यात्रुहरुको बिजोग हुने गरेको छ । बिरामी, मजदुर, सर्वसाधारण तथा गन्तव्यमा पुग्नुपर्ने यात्रुहरुलाई बन्दले निकै दुःख दिने गरेको छ ।

एक दिनको बन्द, हड्तालबाट राज्यलाई अर्बौ नोक्सान हुने गरेको छ । लामो समय कोरोना महामारीले धला परेको नेपाली अर्थतन्त्र उठ्न लागेका बेला बन्द हड्ता जस्ता गतिविधिले पुनः प्रभावित बनाएको छ । बन्दबाट स्वयं बन्दकर्ताहरुसमेत प्रभावित भएका हुन्छन् । शैक्षिक संस्था बन्द हुँदा धेरै विद्यार्थीको पठनपाठनमा प्रभाव पर्दछ । वित्त, व्यापार गर्नेहरुलाई एक दिनको बन्दले पनि ठूलो असर पु¥याउँछ । यस्ता यावत् समस्या उत्पन्न गर्ने बन्द, हड्ताल कसैको पनि हितमा नभएको तथ्य बन्दकर्ताहरुलाई पनि राम्रैसँग ज्ञान छ तर उनीहरुले नै यस्ता बन्द, हड्ताल आह्वान गर्नु दुःखद् हो । बन्द नै समस्याको समाधान पक्कै होइन । यसमा राजनीतिक दल गम्भीर हुनु जरुरी छ । यो मुलुकको आर्थिक समृद्धिमा धक्का लाग्नु मात्र हो । अर्थतन्त्रलाई पुनरुत्थान गर्नु त कता हो कता, सत्ता र कुर्सीको लोभका लागि विभिन्न बहानामा बन्द–हड्ताल गर्नु दुखद् हो । नेपाली जनताको मर्मविपरीत बन्द–हड्ताल गर्नु पार्टी र देशका लागि राम्रो होइन । यो कुरा आन्दोलनकर्ताहरुले बुझ्न जरुरी छ । विगतका बन्द, हड्तालबाट पाठ सिकेर आन्दोलनकर्ताहरुले अब बन्दको विकल्प रोज्नैपर्छ । यस्ता बन्द–हड्ताल तथा चक्काजाम सदाका लागि बन्द गरिनुपर्छ । आफ्नो राजनीतिक स्वार्थ पूरा गर्न बन्द नै समस्याको समाधान भने पक्कै होइन । यसर्थ सर्वसाधारणलाई सास्ती दिएर गरिएको बन्दले कसैको पनि हित गर्दैन । बन्द सधैंका लागि बन्द गरौं ।