पाल्पा, हिन्दू धर्मावलम्बीहरूले आज अधिकमासमा पर्ने विशेष एकादशीका रूपमा मानिने पद्मिनी एकादशी व्रत श्रद्धा, भक्ति र धार्मिक विधिपूर्वक मनाउँदै छन् । वैदिक परम्पराअनुसार अधिकमासको शुक्ल पक्षमा पर्ने यो एकादशी भगवान् विष्णुको आराधना गर्ने महत्वपूर्ण दिन मानिन्छ । धार्मिक विश्वासअनुसार यो दिन  व्रत बस्दा पाप क्षय हुनुका साथै सुख, शान्ति र समृद्धि प्राप्त हुने जनविश्वास रहेको छ ।

देशभरका विष्णु मन्दिरहरूमा बिहानैदेखि भक्तजनहरूको घुइँचो लागेको छ । भक्तजनहरूले स्नान, पूजा, जप तथा दीपदान गरी व्रत बसेका छन् । विशेषगरी भगवान् विष्णु र लक्ष्मीको पूजा आराधना गर्दै रातभर भजन–कीर्तन गर्ने परम्परा पनि रहेको छ । धर्मशास्त्रमा पद्मिनी एकादशीलाई अत्यन्त पुण्यदायी एकादशीका रूपमा वर्णन गरिएको छ । यो व्रतले मनोकामना पूरा हुने तथा आत्मिक शान्ति प्राप्त हुने धार्मिक विश्वास रहेको पण्डितहरूको भनाइ छ । यस अवसरमा विभिन्न धार्मिक संघ–संस्थाले मन्दिर तथा आश्रमहरूमा विशेष पूजा, प्रवचन र भजन कार्यक्रम आयोजना गरेका छन् ।