नेपाल अहिले सामाजिक, राजनीतिक र आर्थिक रूपान्तरणको चरणमा छ । यस्तो समयमा देशको भविष्यलाई सही दिशामा अघि बढाउने मुख्य शक्ति युवा पुस्ता नै हो । ऊर्जा, सिर्जनशीलता र परिवर्तनप्रतिको चाहनाले भरिएको युवा वर्गले आफ्नो भूमिकालाई जिम्मेवारी पूर्वक निर्वाह गर्न सके मात्र समाजको दीगो विकास सम्भव हुन्छ । त्यसैले आजको सन्दर्भमा युवाको जिम्मेवारी केवल व्यक्तिगत उन्नतिमा सीमित नभई राष्ट्रिय निर्माणसँग पनि जोडिएको छ ।

सबैभन्दा पहिले युवाले शिक्षा र ज्ञानलाई आफ्नो मुख्य आधार बनाउनुपर्छ । गुणस्तरीय शिक्षा प्राप्त गर्नु, नयाँ सीप सिक्नु र बदलिँदो विश्वसँग आफूलाई अनुकूल बनाउनु युवाका लागि अत्यन्त आवश्यक छ । आजको प्रतिस्पर्धी युगमा केवल प्रमाणपत्र मात्र पर्याप्त हुँदैन, व्यवहारिक ज्ञान, प्रविधिको उपयोग र नवप्रवर्तनशील सोच पनि उत्तिकै महत्वपूर्ण हुन्छ । शिक्षित र सक्षम युवा नै समाजलाई सही दिशा दिन सक्ने आधारशक्ति बन्न सक्छ । देशभित्रै अवसर सिर्जना गर्ने, उद्यमशीलता विकास गर्ने र स्थानीय स्रोत–साधनको सदुपयोग गर्ने कार्यमा युवाको सहभागिता अपरिहार्य छ । विदेशप्रतिको आकर्षण बढिरहेको अवस्थामा पनि स्वदेशमै सम्भावनाको खोजी गर्नु र सामूहिक प्रयासमार्फत विकासका नयाँ ढोका खोल्नु आजको आवश्यकता हो । अन्ततः युवा केवल भविष्यका कर्णधार मात्र होइनन्, वर्तमानका सक्रिय शक्ति पनि हुन् । उनीहरूको सोच, व्यवहार र संलग्नताले समाजको दिशा निर्धारण गर्छ । यदि युवाले सकारात्मक सोच, अनुशासन र सामाजिक जिम्मेवारीलाई आफ्नो जीवनको आधार बनाउँछन् भने नेपालले समृद्धि र स्थायित्वतर्फ अघि बढ्ने मार्ग अझ फराकिलो बन्न सक्छ । यसैगरी युवाले सामाजिक उत्तरदायित्वप्रति पनि सजग रहनुपर्छ । समाजमा देखिने विकृति, भ्रष्टाचार, असमानता वा विभेदजस्ता समस्याविरुद्ध सचेत आवाज उठाउनु युवाको कर्तव्य हो । सामाजिक सञ्जालको बढ्दो प्रयोगले युवालाई विचार व्यक्त गर्ने ठूलो अवसर दिएको छ, तर यसलाई जिम्मेवारीका साथ प्रयोग गर्नु आवश्यक छ । गलत सूचना फैलाउने वा अनावश्यक विवाद बढाउने भन्दा पनि सकारात्मक सन्देश, सचेतना र रचनात्मक बहसका माध्यमबाट समाजलाई सही बाटोमा डो¥याउन युवाले भूमिका खेल्नुपर्छ । अर्कोतर्फ, राष्ट्रप्रतिको दायित्वबोध पनि युवामा बलियो हुनुपर्छ । त्यसैले आजको समयले युवालाई केवल सपना देख्न मात्र होइन, जिम्मेवारीपूर्वक ती सपना साकार पार्न आह्वान गरिरहेको छ ।