पाल्पा, मखनटोल टोल विकास संस्था तानसेन पाल्पाले २५ औँ वर्ष तथा रजत जयन्तीको अवसरमा स्त्री रोग तथा प्रजनन् स्वास्थ्य सम्बन्धी एकदिने सचेतना अभिमुखीकरण कार्यक्रम गरेको छ ।  महिलाको स्वास्थ्यप्रति सचेतना अभिवृद्धि गर्ने उद्देश्यले आयोजना गरिएको कार्यक्रममा स्त्री रोग, प्रजनन् स्वास्थ्य तथा यससँग सम्बन्धित जोखिम र चुनौतीबारे जानकारी प्रदान गरिएको हो  ।

कार्यक्रममा युनाइटेड मिसन अस्पतालका निर्देशक डा. रचेल कारक तथा नेपाल परिवार नियोजन संघका प्रवन्धक शोवाकान्ता न्यौपानेले सहभागीहरुलाई स्त्री रोग तथा प्रजनन् स्वास्थ्य सम्बन्धी जानकारी गराए ।

अभिमुखीकरण कार्यक्रममा विशेषगरी स्तन क्यान्सर, पाठेघर सम्बन्धी समस्या तथा समग्र प्रजनन् स्वास्थ्यको अवस्था, जोखिम र चुनौतीहरूमा केन्द्रित रहेर छलफल गरिएको थियो ।  प्रशिक्षकहरूले महिलाहरूले आफ्नै शरीरप्रति सचेत हुनुपर्ने, असामान्य लक्षण देखिएमा लाज वा डर नगरी स्वास्थ्य संस्थामा परामर्श लिनुपर्ने कुरामा जोड दिएका थिए । महिलाहरुले नियमित स्वास्थ्य जाँच गर्नाले रोगहरूको  शुरुवाती चरणमै नियन्त्रण गर्न सकिनेमा प्रशिक्षकहरुले  तालिममा सचेत बनाएका थिए ।  उनीहरुले स्त्री रोगका सामान्य लक्षण, समयमै स्वास्थ्य परीक्षणको आवश्यकता, प्रजनन् स्वास्थ्यको महत्व तथा सचेतना अभावका कारण देखिने समस्या बारे प्रष्ट पारे ।

महिला स्वास्थ्यसँग सम्बन्धित विषयमा समुदायस्तरमै यस्ता अभिमुखीकरण कार्यक्रम नियमित रूपमा सञ्चालन गर्न आवश्यक रहेको, महिलाको स्वास्थ्य सुदृढ भए मात्र परिवार र समाज स्वस्थ बन्ने कार्यक्रमका सहभागीले जोड दिए । 

कार्यक्रममा मखनटोल टोल विकास संस्थामा आवद्ध महिला, गृहिणी तथा छात्राहरूको सहभागिता रहेको थियो ।  सहभागीहरूले कार्यक्रम उपयोगी र ज्ञानवद्र्धक भएको बताए ।  कार्यक्रम संस्थाका अध्यक्ष ज्ञानु कार्कीको अध्यक्षता, संस्थाकी पूर्व अध्यक्ष एवं कार्यक्रम संयोजक ज्योती राजभण्डारीको  स्वागत तथा  संस्थाकी सह–सचिव नमिता थैवको सञ्चालनमा भएको थियो ।