पाल्पा, पाल्पामा पनि ७२ औं राष्ट्रिय क्षयरोग नियन्त्रण दिवस विभिन्न कार्यक्रम गरी मनाइएको छ । नेपाल क्षयरोग निवारण संस्था पाल्पा शाखाले अन्तक्र्रिया र पाल्पा  अस्पतालका विरामीहरुलाई फलफुल वितरण गरी दिवस मनाएको हो ।

 दिवसका अवसरमा संस्थाले मोहन कन्य मावि तानसेनमा क्षयरोग सम्बन्धी विद्यार्थीहरुमा अन्तक्र्रिया गराएको हो । कार्यक्रममा तानसेनका ७ वटा विद्यालयका विद्यार्थीहरुको सहभागिता रहेको थियो । जहाँ क्षयरोग के हो ?, नियन्त्रणका उपाय, क्षयरोगको अवस्था लगायतका विषयमा छलफल गरिएको संस्थाका सचिव झपेन्द्र गहिरेले जानकारी दिए । कार्यक्रममा क्षयरोग निवारण संस्थाकी केन्द्रीय उपाध्यक्ष  शोभा शाक्यले संस्था सबैको साँझा भएकाले निस्वार्थ भावले सेवा गर्दै आएको बताइन् । संस्था सञ्चालनमा अनेकौ कठिनाई भएपनि यो क्षेत्रमा काम गर्ने सबै साथीहरुको सहयोग इमान्दारिता कै कारणबाट संस्था सवल र सक्षम बन्दै गएको उनको भनाई छ ।

संस्थाका पाल्पा शाखा अध्यक्ष विधान श्रेष्ठले सचेतना महत्वपूर्ण हुने भएकाले विगतदेखि नै क्षयरोग र एचआईभी सम्बन्धी सचेतनाका कार्यक्रमहरु समुदायस्तरमा सञ्चालन गर्दै आएको बताए । उनले संस्थाले क्षयरोग नियन्त्रण तथा निर्मुल पार्नका लागि बौद्धिक वर्ग विद्यार्थी, शिक्षक,राजनितिक दल, नागरिक समाज, सुरक्षाकर्मीहरुलाई समय–समयमा सचेतनामूलक प्रशिक्षण दिर्दै आएको उल्लेख गरे । कार्यक्रममा संस्थाकी उपाध्यक्ष सुलोचना शाह, सचिव झपेन्द्र गहिरे, सेन माविका शिक्षक कमल अर्याल लगायतले दिवसको चर्चा गरेका थिए । संस्थाले सोही अवसरमा जिल्ला अस्पतालका विरामीहरुलाई फलफूल वितरण गरेको छ । संस्थाका अध्यक्ष  विधान श्रेष्ठ, केन्द्रीय उपाध्यक्ष शोभा शाक्य, अस्पतालका मेडिकल  अधिकृत अरुण भण्डारी लगायत संस्थाका पदाधिकारीहरु अस्पतालमै पुगेर विरामीहरुलाई फलफुल वितरण गरेका हुन् । “हामी सबैको प्रतिबद्धता क्षयरोगको नियन्त्रणमा सफलता ”भन्ने मूल नाराका साथ पाल्पासहित देशैभर विभिन्न कार्यक्रम गरी क्षयरोग दिवस मनाइएको छ ।