पाल्पा, तानसेनमा आँखा अस्पतालको वार्षिक समीक्षा तथा गोष्ठी भएको छ । नेपाल नेत्रज्योति संघ र पाल्पा लायन्स लाकोल आँखा अस्पताल तथा यस अन्तर्गत  रहेका आँखा उपचार  केन्द्रहरुको वार्षिक समीक्षा तथा गोष्ठी गरिएको हो ।

कार्यक्रममा अस्पताल र अस्पताल अन्तर्गतका संस्थाहरुले आ–आफ्नो संस्थाको वार्षिक कार्यप्रगति सार्वजनिक गरेका  छन् । पाल्पा लायन्स लाकोल आँखा अस्पतालका आउटरिच कोर्डिनेटर सन्तोष दर्जीले बार्षिक प्रतिबेदन  प्रस्तुत गरेका थिए । उनले अस्पतालमा  डाक्टरको अभाव भएको, नेपाल  सरकारले लागु  गरेको  रेफर सिस्टमले अप्ठ्यारो  पारेको बताए । अस्पतालका निमित्त व्यवस्थापक जीवनाथ गैरेले करिब  ३ करोड  ४९ लाख ९१ हजार १ सय  ७३ रुपैया  बराबरको आर्थिक  प्रतिवेदन  प्रस्तुत गर्दै उपचार  केन्द्रहरुमा घाटा बजेट  भएको  बताए । कालीगण्डकी  आँखा  उपचार  तथा सर्जिकल सेन्टरका प्रमुख  सुन्दर  रानाले वार्षिक प्रतिवेदन  प्रस्तुत  गर्दै रामपुरमा स्थानीय  निकाय, दाताहरुको राम्रो  सहयोग  र सहकार्य रहेको उल्लेख गरे । उनले भविष्यमा आँखा उपचार केन्द्रलाई अस्पतालमा  परिवर्तन  गर्ने तयारी  भएको  बताए ।  

तिनाउ आखा उपचार  केन्द्रका प्रमुख  रमेश  साहनीले उपचार  केन्द्रको प्रतिवेदन  प्रस्तुत  गर्दै आर्थिक  अभाव  र  उपकरणको अभावका कारण  आँखा उपचारको काम गर्न कठिनाइ भएको भन्दै  अस्पताल  व्यबस्थापन  समितिको  ध्यानाकर्षण गराए । कार्यक्रम  अस्पताल ब्यवस्थापन समितिका  सभापति बुद्धि  प्रसाद शर्माको सभापतित्व र सचिव  राजेन्द्र  लिगलको सञ्चालनमा  कार्यक्रम  भएको  थियो ।