स्थानीय

स्थानीय तहको लोगो डिजाइन गरेका विश्वकर्मालाई नगद सहित सम्मान

Shittalpati Reporter

रमेश विश्वकर्मा
गुल्मी, गुल्मीदरबार गाउँपालिकाको पहिचान सहितको लोगो डिजाइन गरेका गुल्मीका ग्राफिक्स डिजाइनर ईश्वर विश्वकर्मालाई नगद सहित सम्मान गरिएको छ । गाउँपालिकाले दिएको अवधारणा अनुसार लोगो डिजाइन गरेका विश्वकर्मालाई दश हजार नगद सहित प्रशंसा पत्रले सम्मान गरिएको प्रमुख प्रशासकिय अधिकृत लक्ष्मण पाण्डेले जानकारी दिए । विश्वकर्मालाई गाउँपालिकाका अध्यक्ष अशोककुमार थापा, उपाध्यक्ष मिना भण्डारी र प्रमुख प्रशासकीय अधिकृत पाण्डेले संयुक्त रुपमा योगदानको उच्च कदर गर्दै नगद र प्रशंसा पत्रले सम्मान गरेका थिए ।

गाउँपालिकाले गरेको सम्मानले आफुलाई हौसला प्रदान गरेको भन्दै विश्वकर्माले गाउँपालिकालाई धन्यवाद दिएका छन् । गाउँपालिकाले केहि समय अघि पहिचान सहितको लोगो सार्वजनिक गरेको थियो । गाउँपालिका लोगो सार्वजनिक गर्नेमा जिल्लामै पहिलो हो । गाउँपालिकाले पालिकाभित्र रहेका धार्मिक, ऐतिहासिक, पर्यटन, कृषि क्षेत्रलाई समेटेर सार्वजनिक गरिएको लोगोमा रहेका–७ वटा लालीगुराँसले गाउँपालिका भित्रका ७ वटा वडाहरुलाई जनाएको छ । रेसुङ्गाको पहाड र टावर पार्कको संकेतले पर्यटन एवं समृद्धिको संकेत गरेको गाउँपालिकाले जनाएको छ । चारपाला दरवारको भवनले गाउँपालिकाको ऐतिहासिक, धार्मिक र सांस्कृतिक सम्पदाको संकेत गरेको छ । धानको बाला र मकैको संकेतले गाउँपालिका भित्रको कृषि क्षेत्रलाई समावेश गरेको छ । धानको बालामा रहेका दानाले पालिकाका सम्पूर्ण जनप्रतिनिधि एकताको संकेत गरेको छ । लोगोमा रहेको गोल्डेन माछाले गाउँपालिका बासीको सुख, समृद्धि, सौभाग्यको संकेत गरेको प्रमुख प्रशासकिय अधिकृत पाण्डेले बताए ।

झाँकीहरुको संकेतले पालिकाभित्र रहेको कला, संस्कृति र विभिन्न जातजातिको संकेत गरेको छ । गाउँपालिकाको नक्सालाई महिला पुरुषले उचालेको संकेतमा सुखी र समृद्ध पालिका निर्माणमा सबैको साथ र सहयोग रहेको संकेत गरिएको छ । लोगोमा रहेको मौरीको घार र मौरीले गाउँपालिकाका जनप्रतिनिधि, कर्मचारी र जनताले परिश्रमको संकेतसँगै बलिथुम मौरीमा आत्मनिर्भरता भन्ने जनाएको पाण्डेले बताए । लोगोमा रहेको हरियो रङले खेतीयोग्य जमिन र कृषकको प्रतिनिधित्व, रातो रङले आर्थिक क्रान्ति र समृद्धि, सेतो रङले शान्त र सुखी जनताको संकेत गरेको छ । यस्तै पहेलो रङले सौभाग्यको संकेत र निलो रङले पालिकाभित्र स्वच्छ खानेपानीको व्यवस्था भएको संकेत गरेको गाउँपालिकाले जनाएको छ । गाउँपालिका आफैं स्वायत्त भएकाले गाउँपालिकाको पहिचान सहितको लोगो सार्वजनिक गरेको जनाइएको छ ।


प्रकाशित मिति: शनिवार, कार्तिक १, २०७७, ०६:२६:००
प्रतिक्रिया दिनुहोस्