शिक्षा र समाज

भवन तथा बाटो निर्माणकर्मी संघ पाल्पाको अध्यक्षमा पुनःकर्माचार्य

Shittalpati Reporter

पाल्पा, श्रमिक, मजदुर तथा निर्माणकर्मीहरुको साझा संस्था भवन तथा बाटो निर्माणकर्मी संघ पाल्पाको अध्यक्षमा पुनः सुरेश कुमार कर्माचार्य चयन भएका छन् । संघको तानसेनमा भएको ११ औं साधारण सभा तथा ५ औं अधिवेशनले कर्माचार्यलाई पुनः अध्यक्षमा निर्विरोध निर्वाचित गरेको हो ।

संघको तीन वर्षे कार्यकालका लागि कर्माचार्यको नेतृत्वमा दश सदस्यीय कार्यासमिति गठन भएको छ । जसको वरिष्ठ उपाध्यक्षमा लोकबहादुर गाहा, प्रथम उपाध्यक्ष सिद्धिलाल शाही, द्वितीय उपाध्यक्षमा निलकण्ठ देवकोटा, सचिवमा हुमराज बस्याल, सहसचिवमा भरतबहादुर विक, रहेका छन् । यस्तै संघको अधिवेशनले सदस्यहरुमा ओमबहादुर विक, नुनबहादुर राना, राकेश साहनी र चित्रविर कुमाललाई चयन गरेको छ ।

नवनिर्वाचित अध्यक्ष कर्माचार्यले संघलाई थप सशक्त र मजबूद बनाएर लैजाने बताए । उनले श्रमिक, मजदुर वर्गका हरेक समस्यामा संघ प्रतिवद्ध भएर लाग्ने जनाए । नेपालमा वृद्धा अवस्थामा समेत मजदुरी गर्नु पर्ने बाध्यता रहेको भन्दै अध्यक्ष कर्माचार्यले पाल्पामा ७० वर्ष भन्दा माथिका आमा, बुवाहरु समेत अझै श्रम र मजुर गर्दै आएको प्रति दुख व्यक्त गरे । उनले उनीहरुको समस्यालाई ध्यानमा राख्दै संघले वृद्धाभक्ता समेत सञ्चालनमा ल्याएको बताउदै आगामी दिनमा पनि त्यो कार्यक्रमलाई निरन्तरता दिदै जाने बताए । श्रमिक वर्गको क्षेत्रमा संघले उल्लेखीय काम गर्दै आए पनि तानसेन नगरपालिकाबाट नक्सा पासको झन्झटिलो प्रक्रियाका कारण भवन निर्माणको काम कम हुँदै गएको प्रति अध्यक्ष कार्मचार्यले दुख व्यक्त गरे । उनले निर्माणको काम कम हुँदै जाँदा निर्माणकर्मी र श्रमिकको पेशा नै धरापमा परेकाले यसतर्फ ध्यान दिन स्थानीय सरकारलाई आग्रह गरे । नवनिर्वाचित सचिव हुमराज बस्यालले संघका गतिविधिहरुलाई थप रचनात्मक र श्रमिकमैत्री बनाउदै लैजाने बताए । उनले श्रमिक वर्गका समस्या र अधिकारका विषयमा संघ सधै क्रियाशिल रहेने समेत उद्घोष गरे ।


प्रकाशित मिति: बिहिवार, मंसिर २३, २०७८, ०४:५९:००
प्रतिक्रिया दिनुहोस्