रामचन्द्र रायमाझी

पाल्पा, लुम्बिनी प्रदेशका सांसद् तथा नेपाली काँग्रेस पाल्पाका सभापति, युवा नेता वीरबहादुर राना ऊर्जा, जलस्रोत तथा सिँचाइ मन्त्री बनेका छन् । उनले आइतबार प्रदेश प्रमुख अमिक शेरचनबाट पद तथा गोपनीयताको शपथ लिएका छन् । मुख्यमन्त्री कुलप्रसाद केसीले आइतबार रानालाई मन्त्री नियुक्त गरेका हुन् । उनी काँग्रेसको कोटाबाट मन्त्री बनेका छन् । रानासँगै पाल्पाका तीन जना सांसदहरु लुम्बिनी प्रदेशको मन्त्री बनेका छन् । यस अघि जनता समाजवादीबार्टीबाट श्रम रोजगार तथा यातायात मन्त्रीमा पूर्मती ढेंगा नियुक्त भइसकेकी छन् । यस्तै नेकपा (एकीकृत समाजवादी)की सांसद रमा घर्ती कानुन महिला बालबालिका तथा जेष्ठ नागरिक मन्त्री बनेकी छन् । तीनै जना सांसद पाल्पाका समानुपातिक सांसदहरु हुन् । जिल्लाले प्रदेश सरकारमा तीन जना मन्त्री पाएकोमा जिल्लावासी उत्साहित भएका छन् । उनीहरु सामाजिक सञ्जालमार्फत बधाई तथा शुभकामना दिदै खुसी व्यक्त गरेका छन् ।

योसँगै प्रदेश मन्त्रिपरिषद्‍मा ६ मन्त्री र ४ राज्यमन्त्री थपिएका छन् । मुख्यमन्त्री केसीले आइतबार नयाँ मन्त्री नियुक्त गर्दै १७ सदस्यीय मन्त्रिपरिषद् विस्तार गरेका हुन् । नवनियुक्त सबै मन्त्रीहरुले आइतबार नै प्रदेश प्रमुख कार्यालयमा आयोजित कार्यक्रममा पद तथा गोपनियताको शपथ लिएका छन् । ६ मन्त्रीलाई प्रदेश प्रमुख अमिक शेरचनले र ४ राज्यमन्त्रीलाई मुख्यमन्त्री केसीले शपथ गराएका हुन् । काँग्रेस, माओवादी, जसपाको गठबन्धनबाट गत साउन २८ मा ७ सदस्यीय मन्त्रीमण्डल गठन भएको थियो । लुम्बिनीमा काँग्रेसका ४ मन्त्री र २ राज्यमन्त्री, माओवादीको मुख्यमन्त्रीसहित ४ मन्त्री र २ राज्यमन्त्री, जसपाका ३ मन्त्री, नेकपा (एकीकृत समाजवादी)का एक मन्त्री र एक स्वतन्त्र सांसद पनि मन्त्री बनेका छन् । काँग्रेसबाट मन्त्री बनेका वन वातावरण तथा भूसंरक्षण मन्त्री बाँकेका सुरेन्द्र हमाल र शिक्षा विज्ञान युवा तथा खेलकुद मन्त्रीमा रुपन्देहीका वसिउद्दिन खाँ रहेका छन् । त्यस्तै माओवादी केन्द्रबाट मन्त्री बनेका स्वास्थ्य, जनसंख्या तथा परिवार कल्याण मन्त्री दाङका इन्द्रजित थारु, आन्तरिक मामिला तथा सञ्चारमन्त्री बनेका बर्दियाका तिलकराम शर्माले पनि आइतबार शपथ लिएका छन् । त्यस्तै काँग्रेसबाटै बनेका ऊर्जा, जलस्रोत तथा सिँचाइ राज्यमन्त्री अर्जुनकुमार श्रेष्ठ र पर्यटन राज्यमन्त्री रिना नेपाल विकले पनि शपथ लिएका छन् । माओवादी केन्द्रबाट स्वास्थ्य, जनसंख्या तथा परिवार कल्याण राज्यमन्त्री बनेकी दाङकी विमला खत्री वली र कृषि, खाद्य प्रविधि तथा भूमि व्यवस्था राज्यमन्त्री बनेकी सुष्मा यादवले पनि शपथ लिएका छन् ।

को हुन् राना ?

२०२२ साल जेठ १५ गते पाल्पा बगनासकाली गाउँपालिका खानीगाउँमा वीरबदुर रानाको जन्म भएको हो । बुवा टिकाराम राना र आमा गोमती रानाको गर्भबाट जन्मेका रानाको परिवार राजनीतिक पृष्ठभूमिबाट आएको हो । २०४५ देखि राजनीतिक यात्रा सुरु गरेका राना तरुणदलदेखि नेपाली काँग्रेसको क्षेत्रिय सभापति, महाधिवेशन प्रतिनिधि, महासमिति सदस्य, पार्टी जिल्ला सह–सचिव हुँदै जिल्ला सभापति भएका हुन् । राना नेपाली काँग्रेसको १२ महाधिवेशनबाट निर्वाचित जिल्ला सभापति बनेका थिए भने १३ औं महाधिवेशनमा सर्वसहमत रुपमा पुनः पार्टी सभापतिको जिम्मेवारी सम्हाल्दै आएका छन् । २०७० सालको आमनिर्वाचनमा पाल्पा क्षेत्र नं. २ बाट प्रतिनिधि सभा सांसदको उम्मेदवारी बनेका राना तत्कालिन एमालेका सोमप्रसाद पाण्डेयसँग झिनो मतको अन्तरले पराजित भएका थिए । उनी लुम्बिनी प्रदेशमा समानुपातिक तर्फबाट उम्मेदवारी दिई सांसद बनेका हुन् ।