पाल्पा, सिद्धबाबा सडक खण्डको अपार सफलतापछि पाल्पाली गायक कमल भट्टराईले ‘जे गरे नि चल्छ नेपालमा’ बोलको राष्ट्रभक्ति गीत बजारमा लिएर आएका छन् । सार्वजनिक समस्याको रुपमा रहेको सिद्धबाबा सडक खण्डकाका विषयमा समेटिएको गीत आमदर्शक, स्रोता माझ पोस्किसकेका गायक भट्टराईले पुनःराष्ट्रपभक्ति गीत कोसेलीका रुपमा बजारमा लिएर आएका हुन् । उनको शब्द, संगीत र लय रहेको उक्त गीत धिताल फिल्मसले बजारमा ल्याएको छ । उक्त गीतमा भट्टराई र गायिका ममता कोइरालाले स्वर दिएका छन् ।

पाल्पाको बगनासकाली गाउँपालिका ३ मा जन्मिएका भट्टराई पछिल्लो समय लोकदोहीरी र हाँस्य विधाको क्षेत्रमा निकै चर्चित बनेका छन् । पाल्पाली हाँस्य कलाकारका रुपमा रहेको आयाम कार्कीको निर्देशन रहेको भिडियोमा सोम आले, लेखनाथ ढकाल लगायतका कलाकारहरुले अभिनय गरेका छन् । यस गीतको छायांकन/सम्पादन पाल्पाली सञ्चारकर्मी सन्तोष बस्यालले गरेका छन् । यसको छायांकन तानसेन सेरोफेरोका क्षेत्रमा गरिएको छ । देशको समसामयिक अवस्थालाई चित्रण गरिएको गीतमा नेताहरुको कार्य शैली, देशले भोग्नु परेको समस्या र जनताका समस्यालाई शब्दमार्फत गीतमा प्रस्तुत गरिएको छ । गायक भट्टराईले माया प्रितिका गीतहरु भन्दा पनि सामाजिक, सांस्कृतिक र देशप्रेमी गीतहरु गाउने गरेका छन् । लोकगीतहरुमा कर्णप्रिय आवाज दिदै आएका गायक भट्टराई हाँस्य विधामा समेत उत्तिकै दख्खल राख्र्ने गर्दछन् । पछिल्लो पुस्तामा देशप्रतिको भाव हराउँदै गएपछि त्यसलाई पुर्नताजगी दिनको लागि देशभक्ति गीत बजारमा ल्याएको उनले बताए । गायक भट्टराई र कोइरालाले यस अघि बजारमा ल्याएको सिद्धबाबा सडक खण्डको गीतले दर्शक स्रोताको मन जित्न सफल भएको छ ।